• |
  • 極速報價
  • |
  • 會員
  • 產品服務 / 串流版
  • 設定

20/07/2017

【閱讀好重要】識人識字都靠佢

  • 加入最愛專欄
  • 收藏文章
  • Michael & Derek

    Michael & Derek

    著有《我做媽劇停》一書,撰寫「市場」及「職場」兩大類文章。經常與不同機構及院校合作舉辦Marketing及職場座談會。

    本欄每周四更新

    我做Marketing

  不論你做乜嘢行業都好,「識人識字」係十分重要,尤其係做marketing,如果你「唔識人」又「唔識字」,係可以好慘。早前同友人食飯,佢學歷唔高,交際手腕亦好弱,工作6-7年都係浮浮沉沉,係典型香港打工仔嘅寫照。自知冇多餘錢進修,所以想用勤力同經驗彌補「唔識字」嘅不足。不過可惜溝通能力點都係頗為遜色,對答時永遠都係慢半拍,更莫講話要「識人」,就算巧遇良師益友,亦會因為冇乜墨水而令自己對答時一仆一碌,錯失機會,高人立即變成過客。

 

 

  要「識人識字」,最好嘅方法係先令自己有「墨水」,而要有墨水其中一個最好嘅方法必定係閱讀。但近年有個唔係太好嘅現象,好多人會覺得因為社交媒體嘅出現,自己比以前閱讀更多。喺呢個資訊爆炸嘅年代,一打開Facebook,大家除咗會見倒好多「速食文案」同「簡短新聞」之外,亦會見倒好多舉手、投票嘅文案,日日問大家「如果認同嘅請舉手」、「成日去日本請『讚』,去台灣請『心』,去韓國請『笑』」,真係舉手舉到手爛都唔知為乜。再加上內容農場嘅出現,「農民」每日為大家出文,欠缺養份或者質素參差嘅文章灌水式咁攻陷每個人嘅手機,令好多人都養成咗一個「速食文化」。閱讀冇養份、超精簡嘅速食文章並唔係問題,但近年好多人漸漸當呢啲「即食麵」為「營養大餐」,呢個就係問題,分不清文章嘅養份同價值何在,只會令閱讀意義大大減退。數碼嘅閱讀年代,不同嘅文章檔案格式、電子硬件等可能會取代紙本書,但數碼化所造就出來嘅速食文化就絕不能取代真正嘅閱讀。

 

 

  閱讀係一種興趣,亦有人當作係一種投資,而投資閱讀必然會得到正回報。有人投資閱讀當作係「識人識字」嘅方式,當然,確確實實地同一個人面對面交流係最好嘅事,可以了解別人嘅故事,亦能為自己建立Network,令自己有得著。而所謂「用閱讀去識人」,其實係講緊「認識別人」。每個人嘅眼睛同腦袋都係一個錄影機,眼睛所見、腦袋所想嘅事情,都係一個獨立嘅故事,而作者就係善於用文字表達故事的人,所以閱讀一本書,其實就好似閱讀緊作者嘅「錄影機」一樣,你能夠看到每一本書都有一個靈魂,了解到每一個Chapter都有一個意義,同作者交流。閱讀除咗可以令你吸收新事物、了解別人對事情嘅睇法之外,亦可以學習作者嘅思考模式,令自己思想上得到開竅,做一個有墨水的人。

 

 

  閱讀有營養文案嘅人,能經歷無數嘅人生故事;

 

  閱讀「即食麵」嘅人,能經歷一個令自己變成「癡肥」嘅人生;

 

  而唔閱讀嘅人,只能經歷單單一個人生故事。

 

  你可以無車、你可以無樓,但你唔可以無智慧。你未必能夠成為一位成功人士,但一定要做一個有內涵、有價值的人。

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App        財智‧健康‧品味生活
【立即下載】
iOS版: http://goo.gl/5qT9Op
Android版: http://goo.gl/nc3xAn
我要回應

你可能感興趣

  • 生活副刊
  • DIVA
  • 健康好人生