• |
  • 極速報價
  • |
  • 會員
  • 產品服務 / 串流版
  • 設定

29/09/2020

《Online有話兒》美國總統辯論將開戰,侵侵串拜登要驗吓藥?

  • 加入最愛專欄
  • 收藏文章

  美國首場總統大選辯論就快開戰,不過戰前已經火藥味重,拜登就串侵侵(特朗普)唔戴口罩又搞亂美國,侵侵又話拜登成日好似未訓醒,要佢驗吓藥睇吓有無食興奮劑,真係火藥味十足!

 

(Shutterstock圖片) 

 

市民就係老闆,六大題目In兩位員工!

 

 (Shutterstock圖片) 

 

  正所謂:「有得揀,你先至係老闆。」美國人有選票,就係兩位候選人嘅老闆,所以呢次辯論大會就係一場面試會!首場總統辯論將喺當地時間9月29日晚上9時舉行(即香港時間星期三早上),將會分為6個部分,每Part15分鐘。主持人華萊士揀選嘅6大主題包括侵侵和拜登的紀錄(The Trump and Biden Records)、聯邦最高法院(The Supreme Court)、新冠疫情(Covid-19)、經濟(The Economy)、城市中的種族與暴力(Race and Violence in our Cities)以及選舉的誠信(The Integrity of the Election)。

 

  不過侵侵以前做開電視節目,一句:「You are fired!」已經娛樂味好重,未開戰大家都已經好期待。睇牌面侵侵好似經驗十足,不過拜登都唔完全輸晒,因為新冠疫情同埋侵侵眾叛親離都係拜登好好嘅王牌,所以都算係勢均力敵!

 

Sleepy Joe日日未訓醒,侵侵懷疑佢係咪靠藥物撐起精神?

 

(Shutterstock圖片) 

 

  前哨戰成日都有啲口水互噴,嘴賤賤嘅侵侵早幾日又串拜登,要求佢係首場辯論會前後都要接受藥物檢測,睇下Sleepy Joe 究竟有無食禁藥。點解咁講呢?因為侵侵懷疑Sleepy Joe 精神狀態麻麻,懷疑佢會唔會食藥撐起精神,雖然無證據顯示佢有食藥,不過呢個咁好嘅攻擊點,侵侵又點會放過呢?

 

  而77歲嘅拜登,因為年紀漸大而且精神麻麻,成日畀外界質疑佢嘅能力,雖則話年紀大經驗夠,但可唔可撐起4年任期同工作量都係一大疑問。

 

辯論會左右大選結局,尼克遜因為咁而輸?

 

 (Shutterstock圖片) 

 

  總統大選辯論其實係美國有一定歷史,雖然總統辯論委員會係1987年成立,但第一場電視辯論會發生係1960年,當年就係民主黨甘迺迪大戰共和黨尼克遜!不過當年尼克遜剛剛做完手術,氣色唔多好又拒絕化妝,相比起43歲嘅甘迺迪神采飛揚咁款,真係高下立見,所以有人認為尼克遜以微弱差距輸咗1960年總統大選,就喺呢場辯論會出事。

 

  此後美國參選人都開始重視呢次辯論,因為真係發現可以改變選民選擇,從而塑造候選人自身形象,所以辯論會贏輸唔重要,重點係畀選民一種信心,正所謂「輸人唔輸陣」就係咁解!

 

  我就買定花生聽朝睇表演先!

 

撰文:李皆穎

  

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

【先到先得】訂閱etnet YouTube Channel,即可獲贈咖啡禮券!► 立即行動

我要回應

你可能感興趣

放大顯示
  • 生活副刊
  • DIVA
  • 健康好人生