好多公司都會訂閱雜誌，畀員工休息時可以睇雜誌放鬆一下。不過，你又知唔知其實公司訂嘅雜誌，都有好多潛在規定。而且好多時，同事間都會因為雜誌而交惡添！真係「邊個拎到雜誌，邊個就心情差！」，名副其實被詛咒的雜誌！ 

　　先講講訂閱雜誌有乜潛規則。首先，公司訂幾本雜誌返來，公開話使咗錢畀你哋班小薯娛樂，等你哋唔可以話公司無休憩設施、唔人道，真係連打工仔工會都忍唔住加你十分！而且公司使錢畀你哋休息喎！仲想點啊？咁擺明使少少錢想捂住你把口，等你哋班小薯唔可以再要求咁多！第二，邊個話雜誌一定係娛樂、消閒雜誌？好多公司都會訂返有關行業嘅雜誌，例如金融行業訂The Economist、Bloomerg等等，逼你喺休息時間都要吸收行業嘅全新資訊，逼你溫書啊，幾貼心！而且如果有客人上門開會，見到公司上下連pantry姐姐都睇行業相關雜誌，自然覺得貴公司相當專業，形象好啲，簽單都容易啲！但作為扮工仔嘅你，又會唔會因為睇呢啲雜誌而relax呢？ 

　　除咗呢種偽消閒雜誌，有啲公司真係會訂真消閒雜誌嘅。不過，詛咒之雜誌多數就係出現係真消閒雜誌身上！ 

　　首先，有冇試過搵極都搵唔到本雜誌？叫得「公家」雜誌，其實邊個睇完，邊個就有責任將本雜誌還返去common area，等其他同事可以拎嚟睇。偏偏有啲冇公德心同事，每次一有新雜誌就mark實，擺係自己個位，幾時有時間咪睇兩頁囉，未睇晒就長期擺係自己位霸住先，搞到其他同事等到下一期出版，都未睇到呢一期。 

　　第二，有機會畀你睇到雜誌，又有冇試過「睇完等於冇睇」呢？講到咁玄？需知道有時雜誌會有啲redemption 畀讀者拎試用裝或參加抽獎，唔洗講落去應該估到，係啊！本雜誌畀人剪到「一岩一忽」，睇睇下篇文，畀人剪咗個結局；睇睇下張教人化妝嘅圖，啲人好似囚犯咁冇咗對眼，點睇啊？自自然然，你會愈睇愈嬲，仲會遷怒於上一手睇完雜誌嘅人。其實明眼人都知道，未必係上手剪爛本雜誌嘅，只係想搵個發洩對象啫。

　　一本普通、簡單的雜誌，原來由高層角度出發，深藏咗咁多陰謀，仲搵埋打工仔去做演員！不過，呢本雜誌最可怕嘅地方，就真係會令到平時忙到心情差爆嘅各位打工仔心情更差！同事之間嘅關係更加差！你話，呢本係咪被詛咒的雜誌？