祝華仔早日康復 Sammi開騷失聲感同身受

　　【晴報專訊】劉德華原定在紅館舉行20場跨年演唱會，因他患上流感取消餘下七場演出，令歌迷大嘆可惜。鄭秀文（Sammi）在2016年開騷時亦受到失聲困擾，她對好友華仔的遭遇深表同情，認為健康確是無價寶。

Sammi即場獻唱《信者得愛》，並送上新年祝福。

　　鄭秀文、劉浩龍及簡淑兒等前晚在將軍澳出席倒數活動，Sammi表示第一次在港出席商場倒數活動，感覺跟紅館開騷倒數不一樣。對於劉德華失聲及確診流感，兩度宣布取消餘下共七場演唱會，Sammi說︰「我有同佢身邊嘅朋友聯絡，睇下有無嘢幫到手，我之前開騷都試過失聲，但華仔今次仲有流感。其實安仔都試過流感入院，佢係持續發高燒，真係好辛苦。作為觀眾都衷心希望華仔可以快啲好番，睇到佢喊真係好肉赤，喺台上嗰種無力感係好內疚，覺得自己有心無力，係心痛。」

劉德華患流感，取消總共七場個唱。

7月再踏紅館

　　今年七月輪到Sammi舉行演唱會，她透露籌備情況，已經開幾次會，大家最關心的是售票機制，因為「實名制」不是簡單的事，會衍生很多問題，要跟公司再作研究。講到新年願望，Sammi衷心希望大家身體健康，而注重運動的她，縱使天氣寒冷仍無間斷做運動。她笑謂︰「我有跑步，寒冷係阻擋唔到我嘅意志同毅力，其實著夠衫就無問題，當然都要小心。」