• |
  • 極速報價
  • |
  • 會員
  • 產品服務 / 串流版
  • 設定

19/09/2018

山竹襲林鄭

  • 加入最愛專欄
  • 收藏文章
  • 馬天娜

    馬天娜

    畢業後第一份工就係返金鐘,在職場輾輾轉轉,又回到了起點,而金鐘更由當年嘅商業中心,變成為香港權力核心。身為金鐘人,最鍾意就係收盡權力核心外圍同內圍嘅風,識破所有政客嘅語言偽術。

    立會透視鏡

  颱風山竹襲港後兩日,風眼由呢個近十數年來破壞力最強嘅颱風,移到去特首林鄭月娥身上。十號風球翌日,東鐵、巴士、小巴等服務近乎停工運作,大圍站逼滿一心要趕返公司嘅打工一族,場面之震撼比颱風當日片段有過之而無不及,返到公司差唔多要放工嘅怒憤無處可發,只好都發到林鄭身上去。

 

  喺香港,就算係十號風球,政府都唔可能要求所有企業停運,有好多人都係緊守自己嘅工作崗位,更有唔少市民放「風假」都鍾意去留下商場飲茶麥記嘆包,從來無人為呢班默默付出嘅員工發聲,咁點解風球除下反而要全港停工,大家又有無諗過全港停工嘅後果?

 

  好,就當林鄭9月17號一大早宣布全港停工一日,你同阿爸阿媽細路妹好開心咁落去諗住飲茶,去到茶樓見到個老闆呆呆坐喺收銀位置同你講:「無茶飲呀,個個都唔使返工!」之後你就發現全部快餐店、食肆都係一樣關門大吉,好啦,咁去超市街市買嘢自己煮醫肚,點知全部都係重門深鎖,搵餐食嘅機會都無,到時你又會唔會去狂鬧發出停工決定嘅特首呢?

 

  你又可能會反駁:「咁停工係講返寫字樓嗰班,唔係份份工都要停㗎?」政府宣布得,我諗除咗緊急政府服務一定要繼續之外,其他工種好難分門別類話邊啲要返邊啲唔使返,必定係全線唔使返,咁唔通你返寫字樓工就係鑲金嘅,返酒樓食肆街市就係地磚任人踩咩?如果你班坐寫字樓嘅人講得出「部分服務行業係應該要返」呢句說話,咁你同晉惠帝「何不食肉糜」有乜分別?

 

  所以講來講去,站在政府嘅角度,宣布停工所帶來嘅混亂,事必係嚴重過社會繼續半正常運作,最好嘅方法,必定係資方同勞方自己傾掂數,打工仔遲到甚至無到都唔應該受罰。今次林鄭落咗一個最應該落嘅柯打反而遭到滿城漫罵,就連唔少建制中堅槍手都掉轉槍頭,將政府喺風前所做嘅應對功夫完完全全咁抹殺晒,呢粒山竹,殺傷力果然驚人!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
我要回應

你可能感興趣

  • 生活副刊
  • DIVA
  • 健康好人生