• |
  • 極速報價
  • |
  • 會員
  • 產品服務 / 串流版
  • 設定

21/09/2017

防鉛水事件再現 隨機抽樣664個真係夠?

  • 加入最愛專欄
  • 收藏文章
  • Jenny Yin

    Jenny Yin

    於傳媒行業打滾多年,其實亦是打雜多年,八卦天性難改,日常穿梭立法會及政總之間,閒時金鐘中環high tea、購物,順道收集情報。

    言歸政傳

  兩年前嘅「鉛水事件」轟動全港,今日政府就提出咗一個「提升香港食水安全行動計劃」,似乎就係為咗避免「鉛水事件」再現喎!雖然平時Jenny鍾意飲法國礦泉水多啲,但係都好想知道政府有冇啲咩補救措施!

 

 

呢個「提升香港食水安全行動計劃」,似乎就係為咗避免「鉛水事件」再現!

 

「食水安全法」冇聲氣

 

  政府中人同Jenny講,會分5個部分嚟做,聽住喇!分別係「食水標準及水質監測優化計劃」、加強規管內部供水系統,「水安全計劃」、宣傳及公眾教育,同埋「食水安全規管制度」。聽落去都係著重於改善政策,冇乜創意噃!反而民間一直講緊話想立法嘅「食水安全法」就冇聲氣,睇嚟要啲民間團體收貨?有難度!

 

  而因為上次鉛水事件而成立嘅食水安全國際專家小組成員陳漢輝就話,其實香港嘅食水水質同好多發達國家相若,叫大家唔使擔心!又話之前鉛水嗰陣,政府驗水過程好嚴謹,而家啲公屋受鉛水影響嘅風險偏低,無逼切性進行全港驗水喎!但係咁喎,陳生,政府同埋唔同派別嘅政黨都驗過好多次水,出到嚟嘅結果都唔同,政府又話而家未有一個標準去量度食水質素,淨係話會跟世衛咁行,大家都咪話唔擔心!

 

隨機抽樣Cover夠唔夠㗎?

 

  至於政府話會優化水質檢測,打算採用兩級取樣規程,如果第一級超標先至會測試第二級。第一級就係日間隨機抽樣,即係隨機收集1公升唔經沖透嘅樣本,二級就係30分鐘淨水取樣,先將水喉沖水5分鐘,然後關咗佢等30分鐘,再收集1公升嘅樣本。

 

  就咁聽好似好難明,就等Jenny解釋比大家知啦!唔經沖透嘅意思就係政府人員一上到你屋企就可以即刻拎水辦,唔理你之前有冇用過個水喉。咁如果工作人員上門之前,市民啱啱好用完水,令到本身係喉管嘅金屬沖走,而檢驗唔到呢?陳生就話好多國家都係咁驗,而發展局局長黃偉綸都話如果有事,隨機抽樣係會抽到嘅,又話全港抽664個已經算多,叫大家唔使擔心。但係局長,全香港有200幾條屋邨,仲未計私樓同埋食肆,係唔係真係Cover到,Jenny真係有啲保留。

 

高危屋邨額外每幢樓驗

 

  不過估計政府都知鉛水事件上次搞到滿城風雨,點都唔可以咩都唔做,所以黃局長都話如果隨機抽樣抽唔中啲2005年打後落成、喉管採用軟焊方式嘅鉛水高危屋邨,政府都會額外去每幢樓驗水喎!

 

  至於如果真係驗到重金屬含量超標有咩對策?局長似乎就唔係好想答,淨係話會有啲建議畀業主或者住客決定,仲話今次呢個計劃只係開始,叫大家多多支持咁話。唉,冇事的話Jenny都係出返去飲支法國礦泉水先喇!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

「港元定存息率」大比拼 食息都要食得醒 https://goo.gl/i9KA4Y
我要回應

你可能感興趣

  • 生活副刊
  • DIVA
  • 健康好人生