噚日Jenny逗唔到林鄭封利是有少少Sad，不過今日「專業議政」幾位議員搞咗個新春傳媒茶敘，Jenny梗係要去啦，逗多幾封利是補返數！

陳醫生幾時Join咗專業議政？

醫學界陳沛然驚喜現身

　　今日個茶敘雖然唔係全部「專業議政」嘅議員都有出席，不過Jenny見到醫學界議員陳沛然都有份到場噃！佢同Jenny講，今日朝早先啱啱睇完症就即刻落黎茶聚，都未趕得切返辦公室派開工利是呀！

　　不過，陳醫生幾時Join咗專業議政？小妹梗係要去八吓先喇！只見陳醫生講咗句「而家我哋係6+1」（專業議政有6名立法會議員），就唔肯再講落去喇！係咪即係友好團體咁解？定今日來湊吓熱鬧Only？陳醫生，你幾時做咗睇相佬？講野咁玄嘅！

　　雖然今日有陳醫生在場，不過護士界嘅李國麟同埋資訊科技界嘅莫乃光（Charles）就冇到場，梁繼昌（Kenneth）話，Charles而家喺韓國行緊山，所以派咗「代表」公仔同大家拜年，係用3D打印技術整㗎！Jenny同行家們都大呼「好似樣」！人人爭住同幫呢個迷你Charles影張相。

Kenneth仲拎住「Charles」同大家拜年！

「網絡亨通」好重要

　　Kenneth幫Charles轉達祝福，話祝大家「網絡亨通」喎！小妹覺得呢樣真心緊要，呢個年代唔好話冇網絡，淨係成日斷線都已經苦過Dee Dee！呢種望住手機有三格訊號，但係上極都上唔到網嘅感覺，小妹已經喺立法會「體驗」過好多次，希望呢個「網絡亨通」可以快啲實現喇！

　　講時講特首林鄭話成日會同非建制議員Whatsapp噃，郭榮鏗即刻撇清關係，話肯定在座幾位議員都冇同佢Whatsapp，叫大家問吓唔在場嘅另外兩位！

畀個近鏡大家睇!祝各位「網絡亨通」!

　　《財政預算案》下星期出爐，點可以唔問吓呢？Kenneth自己就希望可以「用得其所」，既然今年政府有咁多盈餘，就應該多啲投放資源到教育、醫療、福利等政策上，唔好成日揼晒落啲大白象工程到；身為社福界議員嘅邵家臻當然都有同感喇！佢仲話想送「福有攸歸」呢４個大字畀林鄭添！而身為醫生嘅陳沛然，就梗係祝大家「身心康泰、身體健康」啦！佢講笑咁話，人人都身體健康嘅話，就可少啲入急症室，就唔使排咁耐隊喇！