• |
  • 極速報價
  • |
  • 會員
  • 產品服務 / 串流版
  • 設定

19/07/2018

【不負責任的相】請錯家務助理,搞到日日飲浴室清潔劑?

  • 加入最愛專欄
  • 收藏文章
  • 黃美雲

    黃美雲

    黃美雲小姐(Ms. Amy Wong)有豐富公關廣告經驗,現為廣告公司合夥人,亦是Media Training及溝通技巧的培訓專才。

    黃小姐研究玄學多年,並根據其豐富的商場經驗,融會形象包裝、掌相學、望診學、身體語言、溝通技巧、談判策略、危機管理等學問,編創了「極速性格解碼學」課程,為行政人員提供另類管理智慧。她先後為渣打銀行、香港中華煤氣有限公司、賽馬會等主持培訓課程。

    曾以黃愛媚的筆名,在報章雜誌撰寫專欄,出版的書包括《公關十八般武藝》。

    本欄逢周四更新

    玄來更精彩

  朋友氣到爆炸,佢遲早一係激死,一係被毒死。而罪魁禍首嘅家務助理,唔係外勞,係同胞。

 

  朋友一次放假在家,問助理:

 

  「你用乜嘢嚟洗我隻漱口杯?」

 

  「用百潔布。」助理聞到「火羅」味,左閃右避。

 

  「我意思係用乜嘢洗潔精?我唔見你攞杯去廚房洗,浴室又冇洗碗嘅洗潔精噃。」

 

 

  助理打開浴室嘅櫃,求其指住一排清潔用品,話:

 

  「用呢隻囉。」

 

  「唔該你攞起畀我睇吖。」

 

  好在!佢攞起嘅唔係通渠水、或者清潔馬桶劑,而係洗廁所磁磚嘅萬潔靈。朋友話:

 

  「呢樽上面明顯寫住『浴室清潔劑、強效除垢防霉』喎。」心想:你想同我洗腸咩?

 

  助理眼光光望住佢。朋友㩒住把火問:

 

  「你可唔可以稍為為我設想下呢?我有為你諗噃,我從來唔叫你拎重嘢、唔催你。而家天氣熱,我都唔想你燙衫燙到一身汗,我就用自己嘅人肉燙衫板將啲衫燙平嚟著,你都為我著想吓吖!你自己隻杯會唔會用洗廁所磁磚嘅洗潔精洗吖?」

 

  「我都係用佢洗㗎!」

 

  吹漲!

 

  助理一係好無知、一係好有腦,咁就卸咗隻鑊!

 

 

  朋友畀我睇助理幅相,只見佢眼神空洞,本屬不假思索、只求方便之流。鼻大面大,經常自我感覺良好,永遠唔覺得自己錯,更加未進化到認錯嘅道德層面。加上額頭凹凸凹不平,好似日久失修路面,咁表示思維容易碎片化,專注力、記憶力都差,冇全盤視野,遑論部署咧。

 

  若果有呢種上司(咁嘅相應該做唔到你上司嘅,除非你黑得好徹底)、下屬、朋友,佢地唔一定係想害你,但結果就係搞到你雞毛鴨血。呢類人好有趣,唔只害人,仲唔覺意玩殘自己,因為佢地嘅決策多數甩轆兼死火,所以常常「辣」著側邊嘅人,亦無la la自焚埋!總之,容易搞到大家一鑊泡、一頭煙。之後呢,sorry都冇聲,總之唔關佢事!

 

  如果有呢啲品種喺你周圍遊盪旋轉,想搵你做伴侶或拍擋,我嘅忠告係:寧可錯過、切勿犯錯,否則你大鑊過長期飲浴室清潔劑!

 

「港元定存息率」大比拼 食息都要食得醒 https://goo.gl/i9KA4Y
我要回應

你可能感興趣

  • 生活副刊
  • DIVA
  • 健康好人生