• |
  • 極速報價
  • |
  • 會員
  • 產品服務 / 串流版
  • 設定

22/07/2021

「辭職先留才」是錯誤觀念!不想員工有離心,上司要做到這3個「不」!

  • 加入最愛專欄
  • 收藏文章
  • Michael & Derek

    Michael & Derek

    著有《我做媽劇停》一書,撰寫「市場」及「職場」兩大類文章。經常與不同機構及院校合作舉辦Marketing及職場座談會。

    我做Marketing

    本欄每周四更新

  當幫得手嘅員工辭職時,公司會用好多不同方法去留才,升職或預告升職、加人工或預告年尾有bonus、轉team轉job duty等等。但其實公司經常「辭職先留才」係一個錯誤觀念,員工決定離開,證明問題早已發生,員工都只會覺得後來所做嘅事情只係補救,而非真心。其實公司/上司要諗嘅並非係要做啲乜去留才,而係唔做啲乜令員工有離開嘅念頭。

 

不精神虐待

 

  作為一位工作狂嘅上司可能早已習慣老闆 7 x 24追魂call/短訊,放假冇收到短訊反而覺得唔習慣,但可惜下屬們並唔係咁睇,放工後嘅短訊其實係一種精神虐待。永遠放工/ 放假時WhatsApp你講啲並唔太急嘅公事,無疑間接破壞員工全日嘅心情。如非必要,上司亦要懂得管理一下自己公餘時間,短訊可免則免。而「上司唔通氣」亦係另一種無形嘅精神虐待,例如lunch時日日都要同事陪你食飯,唔懂得俾空間同事「唞下氣」、「講下自己事非」。明明自己早已完成晒手頭工作,但又遲遲唔肯離開公司,間接迫同事一齊OT。其實以上嘅情況只要上司細心少少,往往係可以避免的,唔好長時間俾下屬有太大精神壓力,最後令員工工作效率每況愈下繼而辭職。

 

不開空頭支票

 

  管理一個小組並唔簡單,好多時老闆太離地唔會明下面同事苦況,而下屬們亦唔會理解上司嘅難處,最後令「夾心階層」上司喺管理上經常寸步難行。亦因為咁,上司喺無而為繼嘅情況下,希望暫時解決現有問題而經常向下屬開出不同形式嘅空頭支票,「年尾會升你職」、「試用期後會加人工」等等。職場小薯可能會被騙,但老練少少嘅打工仔一聽到類似以上說話就會好反感。除咗知道呢個承諾九成九不能兌現之餘,亦覺得呢個「升職 / 加人工」已經嚟得太遲。如果真心認同員工嘅價值,必要及早安排佢哋嘅前途。就算因公司制度問題而未能有安排得宜,但必對下屬坦白直接,令佢哋覺得同上司係同一陣線,加強員工歸屬感。

 

不做小動作

 

  要喺辦公室政治下求生,「old seafood」好多時都習慣唔直接去「表達」自己,取而代之會做好多小動作去表達對其他員工嘅不滿。重要會議慢慢skip咗你、你應該要知嘅事情就永遠冇人通告。可能上司並非全心想迫走同事,但久而久之,所有人以及當時人都會覺得該員工係可有可無。除咗價值被貶,呢類小動作亦係另一種侮辱。作為上司,要炒要鬧必須光明正大。而作為公司老闆,見到類似情況不能「隻眼開隻眼閉」,助長歪風時亦會令其他人對公司/上司感到失望,當諗到下一個「受害者」可能係自己,長遠就冇人會對公司忠心耿耿。

 

  留才並非一朝一夕,亦唔係最首要工作,如何「養才」先係重點。工作實在太多不如意事,公司/上司嘅真心能夠帶俾員工一點正能量,同時亦可以加強佢哋嘅歸屬感。肯為員工著想嘅上司,下屬較少會離開,就算真係辭職你亦會替佢哋高興。

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全城注視!銀行定存比較神器,助你搵到最佳息率!► 立即了解

我要回應

你可能感興趣

放大顯示
師傅靈靈法

職場新常態

精選文章

  • 生活
  • DIVA
  • 健康好人生
專業版
HV2
精裝版
SV2
串流版
IQ 登入
強化版
TQ
強化版
MQ