• |
  • 極速報價
  • |
  • 會員
  • 產品服務 / 串流版
  • 設定

28/09/2020

《經濟不停學》黑天鵝?食得㗎?點解動物可以撼動到股市?

  • 加入最愛專欄
  • 收藏文章

  今年上半年環球孖屐真係震到顛,但幾艱難都好,總算係撐過咗,希望大家都平平安安啦!不過,作為精明嘅投資者,我哋要識得從錯誤中學習,例如認識下幾隻動物,好似灰犀牛同黑天鵝咁,威力可以撼動成個市場。走前一步洞察危機,先唔使損手爛腳呀!

 

(Shutterstock)


講你又唔聽,聽你又唔明,撞正灰犀牛唔好喊

(Shutterstock)


  灰犀牛係指極有可能發生、而且影響巨大,但被(或故意)忽視嘅威脅,多數係經過一系列嘅警告同埋明顯嘅先兆後發生嘅。呢個概念最先由一個美國學者米歇爾.克提出,2016年佢出版《灰犀牛:如何應對大概率危機》一書後先廣為流傳。灰犀牛生長喺非洲大草原,好大隻,畀人一種慢吞吞又無害嘅錯覺,不過當佢一旦狂奔,就會有爆發性嘅攻擊力,當然後果亦極具破壞力。


  呢本書嘅作者認為歷史上咁多危機,其實爆發前都有明顯先兆,但係啲人總係抱住僥倖甚至係傲慢嘅心態嚟看待。例如引發咗2008年金融海嘯嘅次按危機,佢認為一開始所有人都知道次債有風險,但依然無乜人理。因為佢投資回報高,表現穩定而受捧,直到泡沫爆破。

非常規風險走漏眼,黑天鵝嚇到怕

(Shutterstock)


  至於黑天鵝係指發生機率極低、超出常規預期範圍,具有廣泛或極端影響嘅事件。


  呢個比喻係起源於16世紀嘅歐洲,因為歐洲人見過嘅天鵝都係白色嘅,所以認為其他顏色嘅天鵝係唔存在。但某一年居然喺澳洲發現黑色嘅天鵝,從此就證明咗黑天鵝唔係「無法想像」嘅生物。反映人嘅諗法通常會受限於對以往嘅認知、設想同假設。但係實際嘅情況往往係更加複雜、而且不可預知。正如我哋習慣以往績預測後市,但事實上真正重大嘅事件係無法預知嘅。


  其中一個著名嘅黑天鵝例子,就係2001年嘅911事件,美股要緊急休市四日,但17號復市嗰日,都係避唔到恐慌性拋售,標普500指數收挫近5巴仙,而道指同納指就分別插逾7巴仙。



天鵝仲有灰色綠色,一嚟你就要驚!

(Shutterstock)


  唔講以為呢集做緊飲食節目,連燒鵝都幾隻色,又黑有綠又灰,深井就肯定無得賣啦,因為綠天鵝係講環保議題,仲有隻灰天鵝係同黑天鵝有關?


  其實綠天鵝比起黑天鵝遲啲出世,前者係由國際清算銀行喺一份報告首先提出嘅,專門用嚟針對氣候變遷嘅風險,佢同黑天鵝嘅唔同之處係雖然氣候變遷嘅影響具有高度不確定性,但風險係極有可能喺實現,而且氣候災難比大多數系統性金融危機更加嚴重,並可能引發更複雜和不可預測的連鎖反應。


  而灰天鵝係指發生嘅機率細至中,但就比較易啲預測,好似中美貿易戰同英國脫歐咁,起初大家都知道,但都覺得唔會發生到好大好大煲,點知而家直情係唔合,仲搞亂埋個股市,慘慘豬囉!

 

撰文:吳藹林

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

【先到先得】訂閱etnet YouTube Channel,即可獲贈咖啡禮券!► 立即行動

我要回應

你可能感興趣

放大顯示
  • 生活副刊
  • DIVA
  • 健康好人生