新劇煞科 湯洛雯心急約馬明拍拖

　　【晴報專訊】湯洛雯（靚湯）與馬國明高調認愛後獲全城祝福，靚湯昨日返無綫電視城出席新劇《一笑渡凡間》拜神儀式，春風滿臉的她，對於馬明的《鐵馬尋橋》兄弟妹投訴二人隱瞞戀情，靚湯即安撫說︰「連我好姊妹岑杏賢都唔知。」

蕭正楠（左二）取笑湯洛雯與馬明拍拖「收穫豐富」。

　　湯洛雯、蕭正楠（阿蕭）及簡淑兒等昨日穿上古裝戲服現身，沐浴於愛河的靚湯全程笑容滿臉，她在台上被拍檔取笑「收穫豐富」時，一臉怕醜說︰「都唔關呢套劇事（指與馬明拍拖）。」靚湯表示今次跟阿蕭有感情戲但無親熱戲，阿蕭即說︰「真係好彩，依家新聞出咗街，攬都唔敢攬啦！」

熱戀中的湯洛雯昨日全程笑唔停。

　　二人表示劇集快將煞科，之後會好好睡覺休息。約男友馬明拍拖？靚湯說︰「我要狂瞓24小時，因為呢排日日外景，真係曬到好攰。依家又無得去旅行，之後可能約出去食下飯，好似正常情侶咁囉。」對於馬明「鐵馬家族」弟妹林子善及唐詩詠投訴他們隱瞞戀情，靚湯說︰「我哋好少話畀人聽，始終想穩定咗先，而且大家開緊劇無時間講，我好姊妹岑杏賢都唔知。（約食飯？）等馬明約好佢班兄弟，如果邀請埋我當然去。」

馬國明與湯洛雯公開「明湯戀」，獲全城祝福。

蕭正楠閃卡升值五倍

　　另外，阿蕭太太黃翠如日前在懷舊玩具店找到阿蕭經典Yes！Card，但翠如見五元一張笑言要考慮買不買。阿蕭笑言當年拍攝時只有24、25歲，非常嫩口︰「翠如好慳家，考慮可能買棵蔥好過買我張卡，我本身無儲，但有粉絲送畀我，放喺屋企某角落。」對於該卡由一元升值到五元，阿蕭話︰「五倍喎開心死啦，如果當年有1,000萬張，依家都有5,000萬啦！」身旁的湯洛雯笑言︰「我以前有儲何嘉莉同張栢芝嘅卡，阿蕭嗰張係咪『o雪o雪o雪』年代？」阿蕭即尷尬說︰「o雪你個頭！等我仲咁忍口唔講你戀情，哼！」