• |
  • 極速報價
  • |
  • 會員
  • 產品服務 / 串流版
  • 設定

25/10/2019

林鄭落台之空穴來風

  • 加入最愛專欄
  • 收藏文章
  • 馬天娜

    馬天娜

    畢業後第一份工就係返金鐘,在職場輾輾轉轉,又回到了起點,而金鐘更由當年嘅商業中心,變成為香港權力核心。身為金鐘人,最鍾意就係收盡權力核心外圍同內圍嘅風,識破所有政客嘅語言偽術。

    立會透視鏡

  講林鄭落台嘅傳聞之前,先講一講區議會選舉。噚晚(24日)進行區議會候選人簡介會,喺抗議聲之中都總算係叫順利完成各區嘅抽籤,係爭海怡西選區仍然未知點處理。不過以噚日簡介會嘅亂局嚟睇,建制派最期望嘅「押後選舉」,機會仍然係高唱入雲,有建制派就估計依家係七三波,七成機會會押後,依家只係等待一個合理時機。

 

  講返林鄭,早幾日重量級外媒《金融時報》報道,林鄭會明年3月落台,繼任人選包括前金管局總裁陳德霖、前政務司長兼全國政協常委唐英年等。雖然國家外交部好快都出來澄清,話呢啲失實傳聞係別有用心,但呢單新聞由咁重量級、咁著重Fact Check嘅傳媒講出來,絕對係空穴來風,未必無因。

 

  呢幾日分別同過數位建制派、同內地有密切關係人士收風,佢地都直截了當咁話,新聞出街之前,佢地係聽都無聽過呢個消息。不過幾位建制派就透露,反修例風波初期,西環都有同林鄭緊密接觸,睇下點樣可以「平亂」,但係亂局未平兼且愈來愈暴力,再加上林鄭受到千夫所指,近兩個月,西環同林鄭已經愈行愈遠,基本上已經去到無偈傾嘅地步。

 

  其中一位建制派人物仲透露,以林鄭依家嘅「聲望」,黐埋去真係負資產,所以建制派寧願拉布都唔想投票反對泛民嘅彈劾林鄭議案,「西環就更加,當初錯估形勢都肯定有人要孭飛,依家亂局唔知點搞,西環自然有咁遠行咁遠,我估計唔少人都同阿爺向林鄭打毒針,仲要係全方位咁打,你話阿爺點會唔對林鄭另眼相看?」

 

  不過呢個時刻,香港一日唔回復平靜,林鄭個位應該都係穩如泰山,因為肯定無人肯坐入炸彈唔知幾時爆炸嘅禮賓府。《金融時報》呢篇報道,稱不上係流料,但阿爺照計應該無定時限,只係想借外媒呢個平台,誘發換特首嘅討論,試試水溫再決定落唔落水。

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
我要回應

你可能感興趣

  • 生活副刊
  • DIVA
  • 健康好人生