• |
  • 極速報價
  • |
  • 會員
  • 產品服務 / 串流版
  • 設定

20/11/2017

中西區會補選近 泛民建制開始造勢叫陣

  • 加入最愛專欄
  • 收藏文章
  • Jenny Yin

    Jenny Yin

    於傳媒行業打滾多年,其實亦是打雜多年,八卦天性難改,日常穿梭立法會及政總之間,閒時金鐘中環high tea、購物,順道收集情報。

    言歸政傳

嚟緊呢個星期日(11月26日)就係中西區區議會補選嘅日子,各個候選人都摩拳擦掌準備迎戰,噚日東華區先有「疑似」建制派嘅獨立呂錦強舉行造勢大會,仲請埋立法會財委會主席陳健波(波哥)幫佢站台添!今日就輪到兩區嘅民主派候選人造勢,俗語云:「輸人唔好輸陣!」,當然唔少泛民中人都現身撐場啦!

 

 呢個唔係「Ya!」,係咁啱大家都係2號候選人啫!

 

泛民終於有次團結一致?

 

  其實兩區嘅民主派候選人雖說同一光譜,但係又各有不同。事關東華嘅候選人伍凱欣(Bonnie)係出名立場溫和嘅民主黨出身,而選山頂嘅錢志健(阿Ed)就曾經係10名「佔中死士」之一。今次佢哋一齊搞呢個造勢會,真係好似阿廸同埋碧雲姨咁講,「團結一致」噃!

 

  兩位候選人都不約而同咁同Jenny講話今次「選情嚴峻」,其中Bonnie兩位對手呂錦強、劉舒燕都係報稱獨立,Bonnie深感自己畀人「左右夾擊」,仲話「有人扮民主、有人扮獨立」,呼籲民主派嘅朋友記得出嚟投票,要集中票源咁話喎!

 

阿Ed有信心,Bonnie有點愁

 

  閒聊之際,Bonnie同Jenny報喜,話說上次Bonnie發現對手呂錦強校長任職嘅新會商會學校將會被用作補選投票站,擔心有利益衝突,所以去咗中西區民政事務處請願,Bonnie對於成功爭取更改票站地址非常開心,話咁就可以對大家都公平啲!

 

  而山頂選區嘅阿Ed嘅對手就只有一個,就係同前任區議員自由黨陳浩濂同黨嘅楊哲安。阿Ed就同Jenny講,前任區議員(即自由黨陳浩濂)做做吓就加入政府做副局,如果自己同Bonnie當選嘅就一定唔會學佢,會完成晒個任期唔Hea做!仲話有信心今次補選嘅投票率會比兩年前高添!之不過,小妹都幾替阿Ed擔心,皆因投票率高同能唔能夠成功當選,好似冇咩直接關係......

 

  不過Bonnie就冇咁樂觀喇!佢同Jenny講,其實自己都幾驚投票率唔高,因為今次始終唔似平時選舉咁,政府會賣晒廣告,話畀大家知幾時有選舉,所以其實有好多街坊都唔知星期日有補選㗎!所以自己唯有多啲叫人出嚟投票啦!

 

  提提大家,中西區區議會補選山頂選區候選人包括錢志健和楊哲安;東華選區候選人包括伍凱欣、呂錦強和劉舒燕。

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
我要回應

你可能感興趣

  • 生活副刊
  • DIVA
  • 健康好人生