• |
  • 極速報價
  • |
  • 會員
  • 產品服務 / 串流版
  • 設定

30/05/2018

終院有女法官 建制口裡說不投票卻很誠實

  • 加入最愛專欄
  • 收藏文章
  • Jenny Yin

    Jenny Yin

    於傳媒行業打滾多年,其實亦是打雜多年,八卦天性難改,日常穿梭立法會及政總之間,閒時金鐘中環high tea、購物,順道收集情報。

    言歸政傳

  香港嘅終審法院有女法官喇!是咁的,今年3月嗰陣,特首林鄭已經接納咗司法人員推薦委員會嘅建議,委任張舉能做終審法院常任法官,鄧楨做終院非常任香港法官,同埋兩名外國女法官做終院其他普通法適用地區非常任法官,不過呢個任命都仲要經立法會通過埋個委任議案先成事嘅!

 

 

 

女人能頂半邊天 兩女官來頭唔嘢少

 

  呢4位法官有咩來頭呢?張舉能本身係高等法院首席法官,65歲嘅佢係一個基督徒,喺基督教敬拜會出任長老。今次張官係接替鄧楨出任終審法院常任法官嘅。而鄧官今年已經71歲,佢今年任期完咗之後,就會由常任法官轉做非常任香港法官喇!

 

  不過今次任命嘅焦點,都係呢兩位終院新女性法官!其中何熙怡女男爵係英國最高法院院長,而麥嘉琳就係加拿大最高法院前首席法官,麥嘉琳仲係第一名來自加拿大嘅終院非常任法官添!

 

  其實一直以來,立法會都未試過否決過法官任命,特首林鄭今次仲特登Highlight埋「終院首次有女法官」,成日話想要多啲「娘子軍」嘅佢勉強都可以話係得償所願嘅!不過點知呢兩位女法官某啲個人立場,就竟然引起咗香港嘅建制派不滿噃!

 

建制否決咪即係落林鄭面!

 

  原來係因為兩位法官喺同志平權方面都抱著開放嘅立場,建制派就話驚佢哋影響到中國傳統家庭價值觀喎!不過,口講就好多不滿,投票嘅時候大家都係照舊投「贊成」,結果議案以60票贊成、0票反對、1票棄權獲得通過,唔知話「立法會唔係橡皮圖章」、唯一一個投棄權票嘅建制派何君堯有咩感受呢?

 

  其實終院審案嗰時,係就係要5名法官一齊審,但係要包括首席法官、3名常任法官、1名非常任法官。而終院非常任法官而家都有成14位,如果要驚兩位女法官審呢類型案件有立場,終院都大可以搵其他非常任法官去審嘅啫!而且人哋話晒係首兩位終院女法官,如果建制一嚟就否決,咪即係落林鄭面!咁大隻鑊,建制派又點敢孭呀!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

「港元定存息率」大比拼 食息都要食得醒 https://goo.gl/i9KA4Y
我要回應

你可能感興趣

  • 生活副刊
  • DIVA
  • 健康好人生