• |
  • 極速報價
  • |
  • 會員
  • 產品服務 / 串流版
  • 設定

24/04/2019

何俊賢抽水抽著火水 涼薄言論狂吸嬲

  • 加入最愛專欄
  • 收藏文章
  • Jenny Yin

    Jenny Yin

    於傳媒行業打滾多年,其實亦是打雜多年,八卦天性難改,日常穿梭立法會及政總之間,閒時金鐘中環high tea、購物,順道收集情報。

    言歸政傳

  今日就係「佔中九子」案判刑,Jenny都一早去定法庭拎定張籌霸定個靚位旁聽。其實佢哋當中有人要判監就預咗㗎啦,不過法官大人亦都考慮到某啲被告嘅健康狀況、感化報告等,所以有部分被告就判處緩刑同社會服務令。

 

 

Tanya患腦瘤 何俊賢衝出來…

 

  判刑呢家嘢,一涉及政治,就肯定有人話判得重、有人話判得輕㗎啦!不過今日案中第四被告陳淑莊(Tanya)就喺庭上透露,由於佢要做腦部手術,希望可以將判刑押後6個星期,法官睇完3份醫生文件之後,接納咗佢嘅要求。Tanya之後喺法庭外就同記者講,係喺上星期發現左腦內有一粒直徑4.2cm嘅瘤,大過乒乓波,已經壓彎咗腦幹,要開刀先知係良性定惡性。佢會向立法會主席告假,同埋呢段時間盡少出席公開活動,先處理好醫療同埋家庭安排。

 

為證唔係扮嘢,Tanya post埋張磁力共振檢驗影像上Facebook

 

  不過,Tanya選擇喺呢個時候講個病出嚟,其實都幾敏感。果不其然,民建聯嘅漁農界議員何俊賢就叻唔切喺Facebook話「一到找數,個個都身患絕症。你玩晒啦~~~」(見圖)

 

 

「嬲嬲」直線升 不如「少啲講冇乜用嘅說話」

 

  有病冇人想,仲需要做開腦手術,唔係講玩、亦更加唔會用來「扮嘢」,Jenny見到個Post同埋何議員支持者嘅留言,不禁倒抽一口涼氣……點解有人可以咁刻毒涼薄?此post一出,旋即引起極大迴響,平日何生啲Facebook post都係得幾十個心情公仔,呢個post唔使幾個鐘就有十倍嘅數量喇!不過絕大部分都係「嬲嬲」,網民亦都喺佢度留言批評佢涼薄。隔咗4個鐘左右,何生就開多個post「澄清」,結果似乎澄極都唔清(見圖): 

 

 

  何議員仲戴個大大的頭盔,話:「可能有人聽了不舒服,但也只能說聲不好意思了,我表達能力不夠好。」身為議員都表達能力不夠好,咁點代表市民發聲呀?其實可以考慮畀個表達能力好啲嘅人代勞啊!

 

  Jenny亦都諗起佢哋前輩、前大主席曾鈺成嗰句「我建議你講少啲講冇乜用嘅說話」,今時今日放喺呢度都幾啱用。而當日受教呢句說話嘅蔣麗芸議員(Ann姐)早就學精咗喇!佢今日個反應就得體過何生好多喇!後生仔學下嘢啦!(見圖)

 

 

「港元定存息率」大比拼 食息都要食得醒 https://goo.gl/i9KA4Y
我要回應

你可能感興趣

  • 生活副刊
  • DIVA
  • 健康好人生