• |
  • 極速報價
  • |
  • 會員
  • 產品服務 / 串流版
  • 設定

11/06/2019

「關鍵」建制派被貼身服侍

  • 加入最愛專欄
  • 收藏文章
  • 馬天娜

    馬天娜

    畢業後第一份工就係返金鐘,在職場輾輾轉轉,又回到了起點,而金鐘更由當年嘅商業中心,變成為香港權力核心。身為金鐘人,最鍾意就係收盡權力核心外圍同內圍嘅風,識破所有政客嘅語言偽術。

    立會透視鏡

  6月9日大遊行,唔理個人數係103萬定係24萬,無可否認嘅係今次遊行人數已經創咗香港回歸以來最高紀錄。就單一議提可以號召咁多香港人上街,真係有啲出乎當局嘅估計,Tina聽聞建制事前最悲觀評估,都只係對上一次民陣13萬人遊行嘅兩倍左右。不過人數多到維港填滿,特首林鄭月娥仍然係一個打100萬個,企硬明日將《逃犯修例》直上立法會進行二讀。

 

  有唔少人,包括2003年七一遊行後倒戈嘅前立法會議員田北俊,對於林鄭無動於衷都有啲意外。有建制中人就同Tina講,林鄭企得硬主要有三個原因。第一,03七一遊行係史無前例嘅,加上當時經濟環境差,社會怨氣極大,當時阿爺見到田大少拉隊倒戈,無辦法之下都要打退堂鼓,董伯伯仲要腳痛落台添。但有咗嗰次經驗,寧願企硬支持林特,如果唔係以後難以管治。有阿爺撐住,林鄭腰板挺得直一直。

 

  第二個原因係數夠票。據聞大遊行當日,政府中人已經同各大建制政黨負責人逐個聯絡,商討回應遊行策略,而各大政黨都已經再次向林鄭表明效忠,確保唔會整套「田少倒戈」Season 2。亦都係咁,政府當晚出新聞稿之後,各大政黨都好快出稿表態支持。

 

  各大政黨出聲效忠都未必夠力水,最後一支強心針就係西環。聽聞西環將會貼身侍候一眾有倒戈風險嘅議員,主要係來自商界嘅代表,一日一Wechat、幾日一通電咁,確保呢班議員知道阿爺好緊張,佢地唔好撳錯反對掣。有建制派就坦言,今次撳呢個掣,比起政改方案來得更緊張,絕對係無任何出錯嘅空間。

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
我要回應

你可能感興趣

  • 生活副刊
  • DIVA
  • 健康好人生