• |
  • 極速報價
  • |
  • 會員
  • 產品服務 / 串流版
  • 設定

23/04/2021

《經濟不停學》小學雞學堂7:道氏理論分牛熊,江恩線計Angle

  • 加入最愛專欄
  • 收藏文章

   上集講解過黃金比率同波浪理論,係相對易掌握嘅分析理論,而今次要講嘅道氏理論同江恩理論較為複雜,雖然話就話呢兩種理論掌握比較難,甚至可以話係「易學難精」!不過當你善於運用,就會發現呢兩種理論係預測股市有唔錯嘅精準度!

 

道氏理論:股市分做三大趨勢六大階段,反映實體經濟

 

  我哋平時會聽到股佬講牛(熊)一、牛(熊)二、牛(熊)三幾個時期,其實就係出自道氏理論,呢套理論認為股市係反映實體經濟,當經濟向好(差),股市都會好(差)。同波浪理論一樣,目標都係判斷趨勢同階段,不過呢個理論會更加強調成交量點樣影響趨勢。

  呢套理論認為,任何市場都會有三種趨勢,包括基本趨勢、中期趨勢同短期變動:基本趨勢係指股價全面上升或下跌,通常持續一年或以上,如果每一浪嘅浪頂同調整浪嘅低位都係愈嚟愈高,可以歸納做上升趨勢;相反如果每一浪嘅浪頂同調整浪嘅低位都係愈嚟愈低,可以歸納做下跌趨勢。而基本趨勢總升(跌)幅會超過兩成,「踏入技術性牛/熊市」就係用呢個基準判斷。

 

  中期趨勢係基本趨勢嘅反向情況,啫係上升趨勢嘅回落同下跌趨勢嘅反彈。調整幅度多數會係總升(跌)幅嘅30%至60%,時間持續三個星期左右。至於短期變動比較容易受人為操控,通常少過6日。

  基本趨勢入面,上升同下降趨勢又會各自分三個階段,就係牛一、牛二、牛三、同熊一、熊二、熊三啦。「牛一」係入貨時機,通常係因為經濟唔好;牛二隨企業盈利提升,交投量會大增,呢個時候用技術分析做trade會賺得多;牛三啲三、四線股升,龍頭股停滯。熊一係出貨時間,源於市場預期企業盈利見頂;熊二係出現恐慌性拋售,跌勢加速,驚完之後可能會有一段反彈或橫行。熊三下跌速度唔會變快,龍頭股會繼續跣。

 

  至於點分嚟緊會升定跌,理論主張用成交量判斷趨勢變化,當收市價升跌幅同成交量成正比,就有機會係升市;成反比嘅話就會跌;都可以配合埋波浪理論一齊用。

 

江恩理論:參考自著名trader,睇股價強弱有角度

 

  江恩理論係源自一個20世紀初嘅傳奇交易員威廉·江恩嘅投資方法,由後人整合而成嘅。認為透過數學、幾何學、宗教、天文學嘅運用可以推測到股市。基於呢個理論嘅圖表、數列分析方法有好多,包括江恩線、江恩扇、江恩螺旋四方形、江恩輪中輪等,以頭兩個最常用。

 

  江恩線係一條45度角嘅線,會將股價圖好明顯咁分為兩部分,當股價處於線上面,就係牛市,相反就係熊市。江恩扇係江恩線嘅進化版,以江恩線為中心,上下各自幅射四條線,啫係總共會有9條線,每一條線都可以拎嚟做支持位同阻力位,用法同平均線差唔多。而每條線都有佢唔同嘅角度,不過依家坊間有啲股票機有江恩扇功能,已經唔使續條自己度。

 

吉利(00175)股價處於下降江恩線之上,係利好訊號。(4月22日截圖

 

  恒指處於下降江恩線之上,係利好訊號。(4月22日截圖)

 

撰文:吳藹林

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

【搶先申請】免費試用etnet強化版MQ手機串流報價服務! ► 立即行動

我要回應

你可能感興趣

放大顯示
周一加油站

精選文章

  • 生活
  • DIVA
  • 健康好人生