與舊上司相處之道

　　有幾多人可以跟ex上司做朋友？

　　「嘩！你前阿姐包容性真係好強，咁都接納到你。」朋友T不會放過任何一個入我位的機會。

　　「係囉，接納等於關懷，我都忍咗你兩個八年。」我輕描淡寫。

　　上星期跟前阿姐吃飯，「其實你真係要好好練下EQ，做人處事要圓滑啲，返工黑面係打工仔嘅死罪。」她瞪大雙眼企圖恫嚇我。

　　「嘻！但係你都無嬲我。」我得戚。

　　在這個「識人好過識字」的世代裏，「唔識做人」的確徒添許多麻煩。怪胎感恩，在「甩甩卡卡」的人生中，遇上幾滴「人生潤滑劑」，包括這個ex阿姐。

　　說起來，已經是八年前的事，就是這個阿姐「毒」具慧眼，將我這怪胎帶入行。當年我們沒幾多交流，大概因為怪胎的小事不必勞煩阿姐出手；亦可能，阿姐對怪胎的工作表現相當滿意。後來離職，和平分手，她還為我找到新出路而安樂：「人地請你就快啲走，你同HR計埋啲假，早啲過去幫手。」

　　世事如棋「鑊鑊」新，八年後轉一團，我們在公司電梯相遇。原來又做「同事」了，不同部門而已，於是我們相約吃飯去。能否跟ex上司做朋友，浪漫的說法是「可遇不可求」，但做人還是實際一點好——辭職時處理才是關鍵。

與ex上司做朋友的好處︰

　　1、搵工「推薦人」首選

　　2、人生導師

　　3、食飯有人買單

　　4、可以一直扮「妹仔」扮年少無知

　　5、阿姐榜樣，他朝上位做阿姐就有了依據

　　公器私用：祝ex阿姐日日有妹仔傍住、事事順境！

原文刊載於ctgoodjobs.hk