辦公室，有沒有朋友？

　　「佢人格分裂架！明明上次讚我個Project度得好，轉個頭竟然喺F面前踩到我地底泥都不如。」同事新妹S著了火般衝入我房，門也不關就「爆大鑊」。

　　「你閂埋道門先。」我輕輕「殊」了她一下。

　　所謂的「爆大鑊」，並非指S披露了甚麼機密，反正辦公室內有人人格分裂，見人講人話，見鬼講鬼話都是公開的現象。「唔係唔畀你呻，但阿妹，呻要呻得醒目啲。」看著眼前的新妹S，就像與10年前的自己打了個照面。

　　「咩啫，爆佢大鑊囉！係丫嘛，前言不對後語都算，覺得個flow有問題咪同我講囉，佢叫到我無得唔改架，但點都唔會係同F講囉！」S的純品，令我覺得如果說同情她的話，簡直是天大的侮辱。強者從來不稀罕他人的同情。其實我反而欣賞她這團火。

　　「唔好咁激動先，你諗清楚，佢有無喺你面前批評過F啲咩？」我明知故問。

　　S發現新大陸般，「有呀有呀……上次……」她欲言又止。

　　「內容你唔使勉強講喇，來來去去都係嗰啲。不過我想你知道，呢啲事總係會發生嘅。而大家都知道你同F比較傾得埋，呢種事更加一定一定會不斷發生，而且只會愈來愈嚴重，直至……」我說。

　　「直至咩？」

　　「直至你地反面囉。」我試探式口吻。

　　「唔會！為咗啲無謂人，朋友都無得做，我唔會，F都唔會。」S發揮強者本色。

　　我深感欣慰，不過為了不讓S走大多歪路，我繼續扮試探︰「你肯定F都當你係朋友？辦公室裏面所謂嘅『朋友』，同我地一直所理解嘅『朋友』係唔同架喎。呢一點你清唔清楚？」人民團結，對統治者來說，大概是一場災難。

　　「我信F，就好似信你一樣。」

　　強者，不必永遠無敵或不曾被擊倒過；而是那些有堅定信念，無論在任何情況下，都分辨得出甚麼可以相信，而且擁有去相信的勇氣的人。

　原文刊載於ctgoodjobs.hk