有AO，真係唔做？

　　「嘩，畀我in到就真係發過豬頭。」「我當年都apply過，連面試機會都無囉。」「咁我勁過你地喇，我in過一次，當時淋正見我。」好大膽子！公然在公司範圍內討論見工事宜，氣氛熱烈過平時開會。但當知道他們說的是考AO、EO，才「唔怪得啦」。

　　對於考AO、EO，我持相當開放的態度，「遊玩時不必掛念我，考到你就即管去考。」我心想。年年AO、EO都爭崩頭，考得入去的，不是天之驕子，就是天之驕女；尤其是AO，成500人爭1個位，fresh graduate起薪亦達$4.3萬。公司有幾大手筆心知肚明，無謂阻人發達，而更重要的是——你以為去考就一定考得入咩。

　　「其實真係會飄。你地諗下，一畢業第1日返工就head住一大班人，當中不乏年紀做得阿爸阿媽嘅下屬。」同事Q曾任職政府部門，具10年工作經驗的他，「服待」過fresh graduate AO妹妹。「因為佢係AO，所以大家都好尊敬呢位畢業生。」

　　我以CD-Rom的姿態旁聽，心裏想，未吃過人間煙火，不知民間疾苦的，一畢業就直搗權力核心，對個人和社會發展到底是不是好事。就目前社會生態來說，入職員工夠「聽話」就足夠，就姑勿論社不社會發展，只管說「個人」。

　　小弟有一「離地」朋友C——即那種未搭過地鐵、鹹水浸過十年八載那種。他畢業回流後第一份工就是AO。打從返工第二個星期開始，就一直想劈炮。然而，即使不屑薪高糧準，亦捨不得位高權重的漂浮權力慾，於是在劈炮與硬食之間，苦纏了3年；才通過試用期，因為「唔想咁就一世」而跳船，後來「紆尊降貴」在私企由低做起，幾年下來，以坐火箭的速度躋身中級管理層。對於曾落入AO塵網的事，盡量不提。

　　「前輩，有無幾句贈下班後生仔？」我事後問C。

　　C笑笑說︰「有咩贈唔贈幾句，每個人行嘅路都唔同。對我嚟講此路不通啫，話唔定係佢地嘅好歸宿。呢個世界總有人enjoy嚴謹架構、上傳下達嘅工作模式。」他望望我，再說︰「況且，殊途同歸。」

　　是的，各有前因莫羨人，只要本身有料到，又上進有毅力的，到哪裏都有出頭天。C目前的人工，肯定不只$4.3萬。

　　原文刊載於ctgoodjobs.hk