帶錯路的獎學金

　　乜都搞唔掂嘅吳克儉局長（簡稱「乜都搞吳掂局長」）真係現今梁班子嘅福星，任何易處理定難搞嘅政策一到佢手，都可以成為一場政治災難，將政府其他嘅潛在災難掩蓋，一夫當關，以負100分之100為滿分，吳克儉民望係負ma 百分之51.2，即係重有百分48.8可以減落去，仲有一年任期，相信民望提款機唔會辜負眾官員嘅期望，繼續透支僅餘嘅民望，同香港眾志一齊繼續中箭。

　　最新嘅撳機項目，就係一帶一路獎學金，相信下個支持位係負百分之60。 不過冇辦法啦，六八九先生想做呀嘛，咪俾佢撳吓機囉。

　　六八九先生在年初的施政報告宣佈，計劃向特區政府獎學基金注資十億元，叫得做基金，即係呢十億只係一粒種子，為嘅係拿取每年嗰3至4%嘅預期回報（亦即係乜都搞吳掂局長早幾日見記者時所講嘅大約3500萬），去作為獎學金，資助「一帶一路沿線國家」嘅大學生來港就讀大學，就係「一帶一路獎學金」嘅由來。

　　當時六八九先生在施政報告朗讀「一帶一路」四粒大字42次，其中呢個獎學金喺事後曾經引起一陣哄動（主要係本欄部分熱門留言人士唔會關心嘅真·香港人哄動），認為點解唔係攞啲錢嚟擺喺香港學生身上，包括增加大學資助學位，或者資助學生到外地升學，而係將啲錢潑出去？咁又要公道啲講一句，政府過去一直有喺獎學基金撥款項俾外地學生來港升學，所以並非只為「帶路沿線國」而設，只不過，嗰啲「特定地區獎學金」，一般屬於市場有需求嘅地區，根據政府資料，包括印尼、韓國，以及東盟國家。「帶路沿線國」純粹係為咗配合國賊嘅國策而設。政府喺一片罵聲出現之後，就開始放風話其實可以考慮係「對等」咁推出獎學金，有幾多個外地學生嚟，就有幾多個本地學生到「帶路沿線國」讀書。

　　乜都搞吳掂局長終於有啲用處，可以幫手推銷呢啲「咁有意義」嘅政策啦，佢打出嘅牌就係，話俾你聽佢好急！香港學生好急！一帶一路都好急！好需要呢筆錢嚟俾錢嚟去廁所！呀唔係，係攞嚟讀書，互相推銷，令大家都明白帶路政策有幾好！前日立法會首次開會傾，局長話2013年已經開始籌備呢項計劃。習總喺當年年底提出「一帶一路」概念，局長當年就開始諗啦！原來呢幾年嚟局長講錯嘢同不停遊埠都係因為一直都諗緊嘢，佢應該以為呢個計劃可以令自己鹹魚翻身？

　　消息傳出，政府想將一帶一路獎學金撥款打尖，喺財委會議程排先過公務員加薪。泛民固然反對，質疑係六特首乜局長合謀嘅獻媚，為咗顯示俾大陸睇自己有幾配合國策，部分議員亦聲言拉布。建制派亦都怨聲載道，質疑政府做乜臨近換屆選舉先搞啲爭議性項目。商界代表自由黨批評政府係攞公務員作為脅逼，新民黨田北辰就話如果政府澄清唔到疑問，就唔會支持，民建聯就因為處理緊點樣用特權嚟斬樹根呢粒瘜肉，所以未有時間諗呢個問題。

　　你哋班建制派真係大膽，竟然夠膽質疑六八九先生嘅連任大計，佢重要喺未來五年將香港脫胎換骨，打造成為「帶路城」架嘛！點可以阻住佢嘅呢！？就此，小弟向六先生提交「一帶一路思想方案」，肯肯定可以令香港人嘅鞋帶同思路都同國家融合：

　　第一：邊個反對獎學金，就告佢種族歧視。

　　第二：支持獎學金嘅，就送自己子女去呢啲地方接受再教育，來個上山下鄉現代版–––上帶上路！安心上路！

　　第三：設立一帶一路獎生意金，要求商家只去呢啲地方做生意，做唔夠四年唔好返嚟。

　　我相信以六特首嘅魄力，一定可以將呢套計劃發揮得淋漓盡致，就算係帶錯路咁又點？佢都唔使上身架啦，有咩鑊咪乜都搞吳掂局長一個人揹晒囉。

　　哈。

　　就咁，一帶一路本身就係一個虛無飄渺嘅概念，甚至乎連概念都講唔上，只係一個通知，話俾中國國內嘅人聽，「嗱，而家呢中國就冇乜路好行架啦，係得返地圖上呢兩條路可以創啲生機出嚟，同沿線國家冇乜話簽啲咩實質協議架，只係話你聽重有呢度大家可以搏吓囉。」問題係，香港嘅商家們唔係最實際嘅咩？語言便利、政局安穩，呢啲營商最緊要條件，帶路沿線國有幾多個可以帶到俾你？「占中」你哋都嗌晒救命啦（雖然最後最大打擊都係大陸經濟差）。

　　更何況，資助學生出國讀書，本身就需要考慮香港嘅老闆認可學歷，香港嘅副學士搞咗咁多年都仍然未得到老闆們認同，問心嗰句，有幾多個真係睇完帶路沿線國嘅大學排名列表，會考慮取錄當地大學嘅畢業生？香港本身擁有嘅學術水平，如果我哋保留得到呢種水平，若學生要出外選擇，為何不是揀選排名較高的大學（多數集中歐美、日本、北京），而係去帶路沿線國讀書？唔好只係同我講新加坡，要宏觀考慮埋中東、中亞細亞、東南歐前蘇聯一帶。

　　以上嘅問題，我冇提供答案，因為大家心知吐明，亦會用腳投票，唔通真係等參加呢個會帶錯你路嘅獎學金？