【Targeting好重要】靠fb落廣告 Maserati賣50部SUV?!

　　你冇睇錯，Maserati就係憑一個Facebook Campaign，賣咗50部SUV。

　　呢個意大利車廠最近做咗一個分兩階段嘅Social Media廣告計劃。第一階段先搵出兩大類Target Group：一、喺社交媒體上分析並抽出較有消費能力，並且對SUV車款有興趣嘅人；二、曾經到訪佢哋官方網頁，並且有瀏覽過SUV車款版面嘅人。就住呢兩班目標人士，車廠嘅團隊再喺Facebook同Instagram兩個平台向佢哋投放影片廣告。

　　第二階段，根據廣告數據分析，如果喺呢班人入面，有人睇晒成條廣告片，車廠就會再向呢班對產品有高度興趣嘅客戶放置針對性廣告。如果客戶點擊呢啲廣告，就可以直接喺Facebook裏面遞交自己嘅簡單資料，問車廠攞報價。由於用戶已經登入咗自己嘅Facebook Account，所以大部分個人基本訊息已經被Autofill，用戶只需點擊確認，就可以完成所有步驟。成個過程亦喺Facebook平台內發生，為時大約3秒。

　　車廠銷售團隊之後就可以逐一跟進呢啲由Facebook傳送過嚟嘅Hot Leads，同客戶溝通並提供報價。埋單計數，呢個Facebook Campaign一共有400萬個Reach，人數雖然唔算好多，但佢哋攞到嘅Leads就超過2.1萬個，最終賣咗50部車。對於呢種高級消費品而言，廣告接觸到嘅人數並唔係最重要，反而將廣告訊息有效傳遞到目標客戶群更為有效。畢竟有能力買車，而且仲要係Maserati嘅人只屬少數。

　　一般人感覺喺社交媒體上落廣告，應該係一啲快速消費品，或者衣服鞋履等產品，因為價錢唔太高，消費者需要考慮嘅時間亦比較短。但今次Maserati嘅Campaign證明只要做好Targeting，計算好Consumer Decision Journey，奢侈品同高級消費品都可以喺社交媒體上成功宣傳。

　　另外，本地個案參考：2016年，Audi同樣喺Social Media上賣廣告，仲搵咗100毛幫佢哋拍咗條片，宣傳佢哋嘅車展。有車廠願意搵一間網上媒體拍攝廣告片，亦算係當時嘅一大突破。

100毛 X Audi廣告片