黃偉綸「禍從口出」？有人反應過敏咗喇！

　　發展局局長黃偉綸上星期去書展分享讀書心得，局長同年輕人交流下，本身都冇乜嘢嘅，仲符合晒今屆政府大大力推行嘅「與青年同行」口號添！不過，噚日警員佐級協會就向局長出信，直指當日局長「言論不當」噃！

世上冇可能個個好人

　　原來係局長喺書展同年輕人分享時，就講到日本小說作家東野圭吾嘅書，話自己好欣賞書中嘅一個論點：「罪犯未必係壞人，犯罪亦都有好多客觀嘅原因，都好多值得同情嘅地方；同樣警察都唔一定個個好人嚟嘅」。

　　以中文為母語嘅人，都會聽得明呢句說話個意思本身就係讚警察喺大家心目中個形象都係好人，但始終「樹大有枯枝」，所以先要特別點明「唔一定個個都好」。呢番說話，Jenny估計局長係希望同學仔唔好被標籤蒙蔽咗雙眼，要有多角度思考。不過就引起警察隊員佐級協會嘅反彈，話感到「極度遺憾」、「大大傷害警務人員的信心」、「打擊警務人員士氣」，仲要求局長回覆以釋疑慮。原意本來係肯定警隊嘅形象正面，結果反而被鬧，Jenny都替局長感到無言。

警察如學壞 最緊要炒得快

　　局長噚日收到信之後，晏晝就覆返協會，佢解釋原意係想表達「人性有其複雜面，被冠以正面標籤的人都未必百分百完美」，所以人與人之間應多點包容，體現同舟之情，不過可能因為當日匆匆幾句，未能清楚說明上述觀點。局長亦都話，對事件引起疑慮深感不安，同意有可改善嘅地方，強調絕非有意冒犯和針對警隊及盡忠職守的警員，自己亦都對警務人員專業精神深表佩服。

　　Jenny就覺得，「乜乜唔一定個個好人」，其實係「阿媽係女人」嘅道理，放喺邊個行業都適用嘅啫！事關每個行業都有害群之馬，行內人又點先保證到「個個都係好人」？Jenny就諗到一個方法，就係「警察如學壞，最緊要炒得快」！咁樣「警察一定個個好人」啦！