小傳日記 | 日本萌系動漫描繪槓桿炒匯賭徒心態猶如成人恐怖片！睇完仲敢唔敢開倉？
《小傳日記》唔知大家有冇睇開動漫呢？筆者作為一個十足嘅動漫迷，每日得閒嘅時候都會開套動漫嚟送飯，而適逢10月係新一個動漫季嘅開始，有唔少有趣嘅新番開播，而近期最受矚目嘅動畫之一，竟然係講財經主題，仲要係炒外匯！呢套《FX戰士久留美》一開播就已經成為ACG城中熱話，但唔好以為動畫就一定係柴娃娃，動畫一開篇就有一段勁長嘅特別提示，總括而言就係警告各位觀眾「外匯交易涉及風險，投資前請謹慎行事」。筆者睇完第一集之後不禁打咗個冷震，原因係動漫入面對散戶炒股嘅描寫太真實，據聞有唔少內容係作者本人嘅親身經歷改編。
先簡介下故事背景先，主角係女大學生福賀久留美（唔係「韭菜」嘅「韭」），佢媽媽以前喺2008年金融海嘯炒外匯，結果慘蝕2000萬日圓隨後自殺，久留美大個之後，決心用自己打工賺嘅30萬日圓做本金，喺FX市場賺返嗰2000萬，幫媽媽出番一口氣。故事聽起嚟好熱血，但喺後續情節入面，久留美作為一個冇乜金融觀念嘅人盲目開大槓桿，故事如何發展就留待讀者自己發掘啦。
我哋一般提到嘅「炒外匯」，通常係指「外匯保證金交易」，投資者透過喺外匯經紀商存入一定嘅保證金，就可以買賣外匯，透過匯率波動賺錢。點解FX咁吸引人？答案其實好簡單：入場門檻相對低、有槓桿，而且匯市喺星期一至星期五近乎24小時運作。但其實外匯投資嘅風險可以話相當高，因為槓桿可以將細微嘅匯率波動放大，令投資者喺短時間內賺取相對本金而言相當可觀嘅回報，但蝕嘅錢自然都會相應放大，當保證金維持率跌至經紀商設定水平，系統可能會強制平倉，即係冇人想見到嘅「爆倉」。
圖片來源：「FX戰士久留美」製作委員會
而喺《久留美》嘅故事開頭，久留美買嘅係「美元兌日圓」，美元兌日圓嘅匯率升嘅話，久留美就會賺錢。而喺久留美嘅收益表入面，美元兌日圓如果升1円，久留美就會賺到30萬日圓，意味住久留美係動畫第一集已經開緊100倍槓桿！但只要匯率反向波動約1%，主角的本金就會全部歸零，而觸發強制平倉往往會早於呢個水平，所以只要日圓跌少少，久留美就已經面對爆倉危機！不過現實就冇咁誇張，日本現時個人FX槓桿上限一般為25倍。
如果故事都只係關於升升跌跌賺完又蝕，咁呢套動漫都唔算有特色，久留美蝕晒D錢可以直接去韓國參加魷魚遊戲。而《久留美》真正驚喜位在於作家對外匯市場有好深刻認識，所以喺後續嘅劇情，竟然可以涉及到套利、QE同央行匯率政策！
例如劇情有講到久留美試過玩歐元兌瑞士法郎，時間線拉返去2015年，嗰陣時歐洲債務危機陰影仲未散晒，歐元持續偏弱，瑞郎作為避險貨幣受到追捧，令瑞郎升值壓力愈來愈大，但匯價升得太快會影響到本土產業，所以瑞士央行出招，設定1歐元兌1.20瑞郎嘅匯率下限，並承諾透過市場干預阻止瑞郎升值至呢條線以上。市場因此就研發咗一個疑似「穩賺唔賠」嘅玩法：喺瑞郎匯率下限之上反覆套利，久留美諗住瑞士央行會死守呢條線，實冇死啦，點知天上飄來一隻黑天鵝……欲知後事如何就去追吓呢套動漫，又或者大家可以去了解下，2015年1月15日發生咩事。
圖片來源：「FX戰士久留美」製作委員會
由於成套動漫有豐富嘅時代背景做參考，加上作者對久留美呢種標準散戶嘅賭徒心理描寫得好入肉，令成套動漫被譽為「成人限定」嘅恐怖片。話說作者本人都係一個好活躍嘅投資者，喺社交媒體「X」度分享自己已經有18年投資經驗，玩過外匯、股票、加密貨幣同石油，仲成日分享自己最近排蝕咗幾多錢，不時仲會發出「25倍槓桿倍數太低啦」之類嘅感嘆！由於作者擁有豐富嘅炒燶嘢經驗，想當然爾，故事有唔少情節可能係佢本人嘅親身經歷，佢甚至仲曾經發文講過：「如果我冇炒燶外匯，久留美就唔會誕生。」
小朋友睇完超人就有可能學飛，家長要記得關緊門窗；大人都一樣，睇完《久留美》當娛樂就算，因為久留美犯咗一個投資大忌，就係盲目追損，仲要係追昔日媽媽留低嘅虧損。已經蝕咗嘅錢已經係沉沒成本，唔應該影響下一步決策，但如果執迷不悟，由理性投資決策變成情緒決策，就會唔滿足於普通嘅金融資產買賣，於是開始加槓桿、加注、拒絕止蝕或者不斷溝貨，甚至借錢，結果蒙受更大損失。人到絕境企圖靠金融市場實現鹹魚翻身，呢種心態比貪心更危險，久留美本來想通過FX市場為死去嘅媽媽出番一口氣，最後分分鐘要拯救埋自己，做咗名副其實嘅「韭留美」，請請！
＊編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。