《小傳日記》胡錫進話消費差關性蕭條事，「性事經濟」點救內需？

　　《小傳日記》近年神州經濟持續低迷，消費疲弱，名牌店一間執完又一間，「消費降級」，「下沉市場」成為近年神州消費市道嘅代名詞。對於消費疲弱，《環球時報》前總編胡錫進創意十足，將矛頭指向「性蕭條」，認為缺乏性繁榮係導致消費低迷嘅主因之一，因為性蕭條會令民眾嘅消費興趣同動力就會減去一大半！

　　胡錫進呼籲社會唔好喺性問題上過度嚴苛，並且要反對「萬惡淫為首」嘅舊觀念。佢仲話，後生仔女如果性蕭條，勢必低慾望，男嘅放工就返屋企，女嘅連買靚衫嘅意欲都無埋。所以，性係消費嘅重要媒介咁話。

　　對於胡錫進呢個講法，神州網友就唔係咁buy，認為佢身為傳媒人，唔去監督公權力，反而呼籲放縱，甚至搞黃色，形容係大開眼界。亦有網友揶揄胡錫進係「為黃一辯」。
　　 　
　　筆者唔知胡錫進點樣知道而家神州處於「性蕭條」，所以先會聯想到可能係呢個原因導致消費不振。如果佢以而家神州出生率低=「性蕭條」，呢個假設恐怕不能成立，皆因唔生唔等於「性蕭條」。生唔生細路，仲有好多考慮，包括生活條件，精神同時間付出等等。

　　眾所周知，一個地方愈係落後，性生活往往愈活躍，皆因消費力低，大家都無錢消費，兩公婆，甚至兩個愛侶得閒無事就關門辦「正經事」。所以，愈係消費能力低嘅國家，出生率就愈高。相反，經濟發達、消費力高嘅地方，啲人反而掛住吃喝玩樂，享受嘅模式亦已經轉移，性反而容易被忽視。就攞神州為例，過去經濟艱難時，出生率奇高，搞到中央要出台一孩政策限制生育。偷生一旦畀「計生辦」捉到，又要罰款又要強行墮胎。而家生活水平高咁多，社會繁榮娛樂方式多籮籮，就算獎勵生育都無咁多人肯生。

　　言歸正傳，現時神州老百姓之所以唔敢消費，原因有好多，首先內房債務爆煲後，內房企業發展及投資受到衝擊，影響上游嘅金融市場例如壞賬。內房動工量減少，亦令下游供應商生意下跌，繼而裁員，環環相扣，影響整體經濟表現。此外，樓價持續下跌，居民名譽財富縮水，但高額房貸依然要還。喺經濟不景氣環境下，各行各業都隨時有裁員出現，面對飯碗隨時不保，試問仲有邊個敢消費？

　　記得大約十年前，兩岸三地做咗一個關於性開放程度嘅調查。調查訪問上海，香港和台北三地嘅年輕人喺性呢個嘅睇法。結果顯示，三地之中以上海對性嘅開放程度最高，台北排中間，香港反而喺呢方面相對地保守。所以，筆者唔明點解胡錫進會擔心神州喺性問題上過度嚴厲。其實，內地改革開放四十幾年，喺性觀念呢方面即使未同西方國家看齊，都唔算係最守舊嗰批，相信佢一時諗多咗。

　　又或者胡錫進覺得，昔日東莞從一個不毛之地，迅速崛起成為大灣區一顆耀眼明星，同佢聞名大江南北嘅「性繁榮」息息相關，咁按照呢個邏輯，而家神州消費市道疲弱，係咪可以照辦煮碗，照搬「東莞模式」去每個省？首先筆者係講笑，其次退一百萬步嚟講，就算真係要靠性經濟救消費，都只係本末倒置，性行業嘅最大消費力來自商務客，即係合作夥伴食飯飲酒傾生意之後嘅「餘興活動」，如果商業發展唔夠景氣，股票又損手，食都冇啖好食，仲邊度有得色呢？，請請！
　
*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。