06/08/2025 17:00
《魚缸博客》絕無後門！英偉達「愛的宣言」唔單止話畀阿爺聽？
《魚缸博客》美國同神州嘅談判大戰仲未打完，可能雙方都知呢個會係一個漫長嘅拗手瓜大賽，所以中途就先解決咗最緊急嘅一環，即係「用稀土換晶片」，先畀大家有啲揸拿再傾落去。隨後就有咗英偉達H20重返神州嘅消息，但「先進」總係令人又愛又恨，官媒上個星期五就高呼「英偉達讓我怎麼相信你」！
《人民日報》上星期五發表評論《英偉達，讓我怎麼相信你？》，要求英偉達要攞出令人信服嘅安全證明，先至能夠消除「中國用戶」嘅後顧之憂。評論當然伴隨行動，所以當局同時亦都約談英偉達，要求就漏洞後門安全風險進行說明，喺呢度筆者都不得不佩服阿爺藝高人膽大，就算面對AI晶片霸主英偉達都依然強硬過人。
強硬背後嘅底氣，當然就係神州龐大嘅市場啦，內地科企開展「AI大煉鋼」，誓要造出媲美西方嘅國產AI大模型，而英偉達自然就係最大受惠者。上年花旗國施加嘅晶片禁令仲維持緊，英偉達就已經率先提及要加強對華合作，包括同比亞迪之類合作開發車用晶片等等，所以根本一早就做好準備等呢一日來臨，當然機會都會留畀有準備嘅人。
既然情投意合，特朗普都唔怕順水推舟，自己仲有稀土落袋。不過神州方面就小心得多，一方面AI發展等用晶片，但英偉達晶片嘅先進程度有可能已經超出阿爺嘅估計，尤其可能包含後門，有美國專家估計英偉達係有能力可以做到「追蹤定位」以及「遠程關閉」等等技術，亦都有美國議員呼籲先進晶片出口必須配備「追蹤定位」。所以喺呢個就嚟「得米」嘅階段，阿爺要求一個承諾（約談），仲打埋開口牌要英偉達證明「絕無後門」。結果當然就係今日呢篇「愛的宣言」，英偉達喺微博「當眾」講明「無後門兼無終止開關」。
不過英偉達嘅長文宣言都幾有趣，其中提到「政府也擁有許多工具和方法來保護國家、消費者和經濟發展，但故意削弱關鍵基礎設施絕不應該成為其中之一」，雖呢篇宣言係用嚟向阿爺表明心跡，但呢一句就更加似係要同有意用英偉達嚟做磨心嘅別有用心人士講明，咪使旨意拆散我哋兩個！
《編者按》本欄搜羅即市傳聞，惟消息未經證實，《經濟通》亦不保證內容之準確性。
《人民日報》上星期五發表評論《英偉達，讓我怎麼相信你？》，要求英偉達要攞出令人信服嘅安全證明，先至能夠消除「中國用戶」嘅後顧之憂。評論當然伴隨行動，所以當局同時亦都約談英偉達，要求就漏洞後門安全風險進行說明，喺呢度筆者都不得不佩服阿爺藝高人膽大，就算面對AI晶片霸主英偉達都依然強硬過人。
強硬背後嘅底氣，當然就係神州龐大嘅市場啦，內地科企開展「AI大煉鋼」，誓要造出媲美西方嘅國產AI大模型，而英偉達自然就係最大受惠者。上年花旗國施加嘅晶片禁令仲維持緊，英偉達就已經率先提及要加強對華合作，包括同比亞迪之類合作開發車用晶片等等，所以根本一早就做好準備等呢一日來臨，當然機會都會留畀有準備嘅人。
既然情投意合，特朗普都唔怕順水推舟，自己仲有稀土落袋。不過神州方面就小心得多，一方面AI發展等用晶片，但英偉達晶片嘅先進程度有可能已經超出阿爺嘅估計，尤其可能包含後門，有美國專家估計英偉達係有能力可以做到「追蹤定位」以及「遠程關閉」等等技術，亦都有美國議員呼籲先進晶片出口必須配備「追蹤定位」。所以喺呢個就嚟「得米」嘅階段，阿爺要求一個承諾（約談），仲打埋開口牌要英偉達證明「絕無後門」。結果當然就係今日呢篇「愛的宣言」，英偉達喺微博「當眾」講明「無後門兼無終止開關」。
不過英偉達嘅長文宣言都幾有趣，其中提到「政府也擁有許多工具和方法來保護國家、消費者和經濟發展，但故意削弱關鍵基礎設施絕不應該成為其中之一」，雖呢篇宣言係用嚟向阿爺表明心跡，但呢一句就更加似係要同有意用英偉達嚟做磨心嘅別有用心人士講明，咪使旨意拆散我哋兩個！
《編者按》本欄搜羅即市傳聞，惟消息未經證實，《經濟通》亦不保證內容之準確性。