• |
  • 極速報價
  • |
  • 會員
  • 產品服務 / 串流版
  • 設定

02/04/2020

【演講技巧】善用3個演講Magic Words,加強記憶兼令觀眾聚焦!

  • 加入最愛專欄
  • 收藏文章
  • Michael & Derek

    Michael & Derek

    著有《我做媽劇停》一書,撰寫「市場」及「職場」兩大類文章。經常與不同機構及院校合作舉辦Marketing及職場座談會。

    本欄每周四更新

    我做Marketing

  一個好嘅演講,主要包含三大元素:說話技巧、內容、心理質素。對唔係太能言善辯嘅演講者嚟講,就算你內容非常豐富,好多時都會因為信心問題,再加上冇一個好嘅內容結構,而令演講錯漏百出。但如果能夠建立對自己演講有用生字,喺適當嘅時候加入,可以幫你輕輕改善演講架構,亦對演講加多點信心。

 

  「第一」

 

  睇/聽演講唔同睇書,當觀眾唔記得之前嘅內容時,好難即刻回帶翻睇再了解。如果觀眾感到混亂嘅時間愈長,佢哋就會慢慢失去成個演講嘅方向感。「第一」嘅出現,就能夠較易去draw到觀眾嘅attention,同時間帶出一個訊息,「我已經幫你總結咗以下 X 個重點」嘅感覺,即時令人覺得演講好有條理。另一方面,數字亦係一個增強記憶力嘅工具,所以大家經常聽到公司高層講「今年我哋有三個目標、六個方案、八個原則」。咁做除咗令自己易記之外,觀眾亦較易入腦。

 

  有一點較為tricky嘅係,就算你嘅記性十分差都好,經常唔記得自己講到邊、講到第幾點,都可以照用「第一」。因為就算「第一」出現後未有「第二」,其實都無問題,因為觀眾未必會記得,就算有一、兩位觀眾記得,亦未必會舉手問及第二係乜嘢。所以喺演講初段出現「第一」,就算再冇第二第三,其實係可以的。

 

  「如果你.....」

 

  受制於環境/內容/ 觀眾等因素影響,好多presentation通常都會較為單向、欠缺互動,加上大多觀眾都唔太主動,就算你不停提問嘗試產生互動,都唔會有人回應。但其實除咗問問題之外,利用「代入」亦能夠做到間接小互動。

 

  大家可以試試,喺論點首/末時,用「大家試諗下,如果你.....」、「記唔記得你上一次.....係幾時」、「大家有冇聽過呢段新聞.......」,後面再加上一個大家必定有試過、而有共鳴嘅日常例子,嘗試用引導性問題令觀眾不自覺地回憶自己嘅經歷,呢個手法能夠避開觀眾嘅軀殼,間接同佢哋嘅腦袋互動,一來可以令大家回一回神,二來亦能產生共鳴感,令佢哋覺得自己同該話題好近,有時效果可能比提問更好。

 

  「最後」

 

  同「第一」有少少唔同,「最後」係一個能夠叫人回神嘅詞語。佢唔係必定要出現,但當「最後」出現時,會令人產生一個期待嘅效果。第一個期待係,觀眾會覺得演講嘅尾段一定會有總結,而呢個總結先係全個演講嘅精髓,所以會特別留心。第二係期待演講就快完結,發緊夢、玩緊手機嘅觀眾,都會突然集中起來,準備離開。所以如果能夠適當善用「最後」,其實係可以好好控制到內容嘅起承轉合。 

 

  Magic word係冇絕對,每個人都應該都要有自己嘅style同magic word,就算你嗰套magic word未必100%有用,但最少呢類magic word嘅手法,能夠起到定心丸同加強記憶嘅作用,對你嘅演講有一定幫助。

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經 ‧ 生活App獨家「銀行匯率比較」功能 立即下載 iOS/Android

我要回應

你可能感興趣

  • 生活副刊
  • DIVA
  • 健康好人生