抱殘守缺由他去

　　2月22日星期一，睇落平平無奇冇乜新聞，但黃昏過後，香港電視界風起雲湧。亞視繼續拖糧，新聞曾經停播十四日，在這一兩年存在感極低的通訊局，終於找到切入點，宣布因為亞視嚴重違反牌照規定，局方要正式展開釘牌程序，但網民預備好晒嘅小鳳姐未出動得住，因為未即時釘牌，按法例亞視有二十八日作申述，通訊局自己都話，在四月一日亞視牌照期滿前，完成釘牌手續的可能性相當低。咁政府有冇做到嘢呢究竟？做咗啦！我實際上未釘佢，心態上都釘咗架啦！

　　在同一個晚上，無線不甘後人，一段新聞報道，變成新聞主角。由高清翡翠台演變而成的J5台，號稱主力播放財經資訊、集歷史文化節目於一身，但喜歡凡事挑機的網民，不滿無線在晚上八時的黃金送飯時段，播放普通話新聞報道，字幕、Namecard、Graphics，全部都係簡體字，冇得轉繁體，硬食。

　　無線回應傳媒查詢時話，普通話節目配簡體字好正常，又指香港是國際城市，做法可以配合不同觀眾需要。啱呀，我好認同，由這數年來，他們的時事專題節目加上普通話配音、外語及普通話節目取消粵語配音，再到今年初表示在深圳覓地建電視城，都話畀你班香港人知，無線預備好做香港中央台了，來吧！

　　再睇返無線去年的業績報告，香港市場收入佔七成二，排第一，大陸市場的營運收入佔百分之七，排第三，僅次於星馬市場，所以根據中國邏輯，在黃金時段拿百分之二十的大氣電波，去Serve一個佔一成都唔夠的市場，是非常合符邏輯的，唔好質疑，信就得架啦！

　　其實我好感動，亞視和鳳凰不夠膽做的，無線終於做到了，無視你們這群香港人，以行動證明自己擁抱大陸、擁抱黨的路線，竟然還惹來過萬宗投訴？他們用心良苦，你們這群香港人還不多謝無線？沒有無線這個舉動，大家會記得自己的文字原來開始受打壓了嗎？會記得屬於自己的文化，要出力捍衞嗎？

　　還投訴甚麼，直接在電視機上刪去這條頻道吧！我們這些「抱繁守正」的香港人，就是不想「上進」去跟你那套「簡化」規則，我們很簡單，想睇返呢啲多筆劃嘅字，因為我們的歷史和文化，都建立在這些文字上。

　　亞視代表一個年代的終結，無線想創造一個新時代？我們就成全你們，由你走，返大陸，抱「殘」守缺賺大陸的錢，好行夾唔送。香港人要的，是一個用港字、講港話、愛港人的電視台。