《小傳日記》五二零唔談戀愛？拆解愛情需求，擁抱談情都有得租！

　　《小傳日記》今日又到咗一年一度嘅520，呢個充滿粉紅泡泡嘅日子，之前大家都會被人哋嘅恩愛攻陷，但宜家唔同咗，唔少人都係專心事業，搵錢先係正經事。而愛情呢？雖然未至於話完全冇人要，但喺呢個快節奏、內捲得嚟壓力大嘅社會，大家對愛情嘅態度已經發生咗好大嘅變化。

　　宜家好多人已經唔再覺得愛情係唯一可以填補孤獨嘅方式，反而覺得有啲感情需求可以直接用錢解決，唔需要再花費大量嘅心機去維護一段感情。最簡單嘅例子就係租擁抱。神州社交平台甚至有人可以提供擁抱服務，價錢、時間、姿勢、地點，甚至對方體型你都可以事先講清楚。譬如話，50蚊就可以攬個猛男5分鐘，簡單直接，幫你即刻「充電」，係有啲尷尬嘅，買賣雙方記得點到即止！

　　再進階啲嘅玩法就有二次元cosplay委託。你可以委託人扮成你鍾意嘅二次元角色，要求高度還原，無論係造型、人設甚至角色嘅性格都要貼到足足哋。然之後，再同呢個角色進行一場「約會」，但係呢啲服務嘅費用就唔平啦，除了委託費之外，仲要包埋全程嘅食飯、交通、住宿消費。雖然呢啲約會本質上都係假嘅，但都有唔少人反應，喺委託完之後，仲會有一啲「戒斷反應」添。

　　仲有啲年輕人會選擇玩主打戀愛情節嘅劇本殺嚟滿足情感需求。呢啲劇本通常都係圍住男女主角嚟寫，劇情轟轟烈烈，其他玩家基本上都係幫手襯托下氣氛，充當NPC幫主角造夢。玩呢啲劇本殺，主角除咗自己嘅費用，仲要畀額外錢補貼其他玩家，一次玩幾個鐘，少則幾百，多則上千。

　　如果你比較社恐，仲有語音直播可以揀。喺啲直播平台，你可以揀自己鍾意嘅聲音主播，佢哋會做啲哄睡、聊天、念稿嘅服務，甚至可以特登為你錄啲指定內容。雖然喺呢啲直播入面，你見唔到對方嘅樣，但有人鍾意聽聲丫嘛，都已經足夠滿足到啲人嘅陪伴需求。同真人主播一樣，出名嘅聲音主播收入都可以好豐厚，有啲人為咗刷存在感不惜花幾萬蚊去打賞，換取主播對你嘅特別關注，仲喺你入直播間嗰陣講幾句特別嘅寒暄。

　　現代人夠功利，談戀愛都要講求情緒價值，即係要開心要認同感要滿足感，如果將戀愛嘅體驗分皮拆骨，咁的確係可以斷斤去買賣，而且唔需要承擔一段真感情入面嘅風險同壓力，不過感情關係當中所有嘢都可以交易，買賣雙方都須留意當中嘅道德風險，請請！
　　
*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。