《小傳日記》美國KFC轉會可口可樂，百事痛失快餐半壁江山！

　　《小傳日記》唔知大家飲可樂係「可口可樂派」定「百事派」？筆者個人就比較隨意，但身邊有啲朋友鍾意可口可樂，所以一齊快食個Lunch都會揀麥當勞。不過，過往40年一直都用百事做飲品供應商嘅美國KFC（留意番，係美國咋），今次一改老傳統，轉用可口可樂做供應商，美國全線分店明年1月起轉飲可口可樂。以往我哋對快餐店嘅格局默認都係「麥當勞x可口可樂」同「KFCx百事可樂」㗎嘛，點知今次連KFC都轉軚用可口可樂，百事少咗KFC呢個大客，原本業績已經唔係咁好，而家只怕會雪上加霜！

　　但呢個世界總有人鍾意百事多過可口可樂，美國KFC好好哋點解要轉用可口可樂？當地總裁就話，今次呢個決定係KFC「重振雄風」嘅關鍵，會透過同可口可樂合作，推出更多新口味飲品系列。單論可樂口味兩大品牌各有擁躉，但可口可樂除咗可樂之外，仲有超過200種飲品品牌，品類涵蓋果汁、茶、碳酸飲品、咖啡，所以快餐店同可口可樂合作一次可以滿足晒N個願望；反觀百事雖然旗下都有七喜，另外亦同立頓合作，但其實百事更成功嘅係零食產業，收入有超過一半都來自零食，例如樂事薯片、多樂脆粟米片，仲有桂格燕麥。

　　由於百事可以提供到嘅新口味實在太少，咁KFC選擇轉投可口可樂嘅懷抱都在所難免，尤其係可口可樂最近推出咗一款「Freestyle噴泉機」嘅產品，入面裝住幾十種唔同口味嘅濃縮液，可以組合出超過一百種以上的飲品同客製化口味，用家只需要掃一掃code，就可以隨自己心水Mix返中意嘅嘢飲，甜度都有得揀，有分析就估計，KFC可能係從呢部機器見到可口可樂嘅創新實力，先決定擺脫歷史包袱，轉會可口可樂。

　　呢幾年百事嘅表現一直都唔係咁好，喺美國十大碳酸飲品嘅排名入面，本來都一直排喺可口可樂下面，前兩年甚至被Dr. Pepper反超，依家只能夠屈居第三。前嗰排百事(US.PEP)啱啱出完第三季業績，淨營收252.7億美元，雖然高過市場預期嘅249.5億美元，但百事同時下調埋全年核心盈利增長預測，預計今年核心EPS最多只會增長2%，遠低過預期嘅4%至6%，原因就係北美地區業務需求疲弱。

　　百事之前已經畀北美消費者投訴過啲零食太貴，一包薯片收你7美金，換返港紙差唔多55蚊！因此百事零食嗰期嘅銷量直接插水。之後百事即刻將啲薯片、汽水減價15%去挽回客源，但未有挽回銷量，而中東嗰邊繼續打仗，百事開始頂唔住成本壓力，結果都係要加番價。而百事嘅股價都插咗唔少，今年股價最高位大概170美元，結果依家得返大概128美元，以此計算市值跌咗差唔多25%。

　　除此之外，大環境興減糖，減肥神藥GLP-1全球盛行，呢隻藥會透過抵制食慾、延遲胃部排空去控制血糖同減重，用家唔單止正餐食少咗，連手邊嗰包薯片、雪櫃嗰罐汽水都全部戒埋，再加上美國農業部最近幾年開始喺各州陸續限制食物券換領部分含糖飲品和零食，人哋連食零食嘅機會都唔畀你，你減到幾平都冇用，搞到百事業務復甦嘅壓力愈來愈大。百事千秋危急之際如何破局，筆者決定買番支百事生可樂，一邊飲一邊觀望，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。