小傳日記 | 從化賽馬場驚傳再難產，神州重啟賽馬終成黃粱美夢？
賽馬係一個歷史悠久卻依然充滿活力嘅獨特產業，歐洲百年賽事歷久不衰，香港單日投注額動輒十幾億，再望望隔離日本，甚至將幾十年前嘅歷史名馬改造成「馬娘」IP，製作動漫同手遊，仲成功吸引埋一班年輕一代入場睇馬添。至於神州大陸不時都吹風話要重新搞起賽馬，但一直都未成到事，原定下個月31號廣州從化馬場將重新舉行賽馬活動，可能係最接近願望成真嘅一次，可惜臨門一腳撻Q，馬會突然發公告，話經相關部門評估風險之後，賽事要延期舉行咁話。
遙想七年前廣州從化馬場曾經舉辦過一次「純演示性速度馬術比賽」，合共5場示範賽事，不設博彩、不接受下注，但仍然吸引過千人入場觀看。可惜嘅係，當日賽事結束後從化馬場再無encore。
唔講唔知，喺改革開放初期，廣東賽馬活動可謂有聲有色。廣州賽馬場喺1993年1月28日舉辦新中國破天荒第一場比賽，投注額就已經超過60萬人仔，喺2月20號嘅第二場比賽投注額更加過百萬，最鼎盛嘅時候一個禮拜有三次比賽，投注額最多超過1200萬人仔，要知道當年廣東職工全年收入平均只有6000人仔，可想而知有幾踴躍！喺1993年到1999年加加埋埋舉行咗757場比賽，不過後來當局叫停廣州賽馬，廣州賽馬娛樂總公司總經理黃啟恒更因為受賄同挪用公款罪，被判19年有期徒刑，自此冇呢支歌仔唱。廣州賽馬場「遺址」之後被用嚟發展餐廳、家具、汽車銷售等產業，但一直都不溫不火，最後塊地喺今年2月俾越秀地產(00123)用236億人仔拍咗。
神州一向對「黃賭毒」堅決說不，但唔少地方政府仍然心思思想發展賽馬，無他，錢作怪啫！喺2001年嘅北京，通順賽馬場順利開業，一開始唔玩真金白銀，「低調發育」，兩年後試水溫搞咗個「投注競猜」，一樣冇事，2004年3月就向當地稅務局申請「投注競猜賽馬」，承諾收入七成返還投注者，兩成交稅，剩低一成歸馬場。通順賽馬場最初都搞出一番名堂，最熱鬧嘅時候有三四千人入場，仲喺北京電視台體育頻道直播添，但未夠半年就有公安部門介入叫停，此後通順賽馬場多次試圖「復出」均告失敗，最終無力經營關門大吉。
睇返近代少少，海南省被國家定位做省級經濟特區，話明係「特區」，係咪代表可以效仿香港鋪草皮？2018年國家出台《中共中央國務院關於支持海南全面深化改革開放的指導意見》，文件提出過要發展賽馬同競猜型體育彩票，即刻引發無限遐想！嗰陣時涉及海南概念嘅A股集體大升，例如原本賣豬肉同搞房地產嘅羅牛山(深:000735)就話過要用成288億人仔喺海南起賽馬小鎮，股價一度狂飆。但海南省委書記事後出嚟澄清，直指「開放博彩業脫離國情」，海南省旅體廳官員亦喺2020年確認，海南根本冇賽馬發展嘅時間表。最終海南跑馬仔美夢落空，不過全島免稅封關就順利落實到。
經過多次狼來了，今次從化賽馬再踩煞車，大家都唔應該感到意外，至於境內興建合法賭場就更加係天荒夜譚。然而你唔做大把人搶住做，新加坡、韓國、馬來西亞、菲律賓、柬埔寨、越南、老撾同緬甸都開設咗合法賭場，泰國同日本亦都積極推動賭博旅遊產業，希望打造下一個拉斯維加斯。博彩業帶嚟嘅收入相當可觀，仲可以帶動埋當地旅遊酒店餐飲娛樂事業，不過神州高瞻遠矚，志在轉型high-tech，送個外賣都要出動無人機，睇唔上呢種低俗產業都理所當然，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。