小傳日記 | 破產之王死於破產，AI初創心急求購頂級律師行百年遺產

　　擁有95年歷史嘅華爾街頂級律師行威嘉(Weil, Gotshal & Manges)，最近因為一班重量級合夥人集體跳船，突然直接走到解散清算呢一步，創下美國歷史上規模最大、金額最高嘅律師行倒閉記錄。身為傳統「白鞋所(White Shoe Firm)」嘅龍頭，威嘉巔峰時期過千名律師，年營收穩坐全國Top30，曾親手操盤過史上最知名嘅巨型企業倒閉案，包括安然、通用汽車同雷曼兄弟，結果「破產之王」自己都要死於破產。律師行某程度上都同球會類似，只要核心人才流失，客戶跟住走埋，就算有百年底蘊都冇用。

 

 

　　不過今日筆者想講嘅係事件後續發展，正當大家感慨威嘉無預兆猝死之際，一家成立不足兩年、估值已經爆到4億美元嘅AI法律初創公司Crosby，半路殺出嚟要資產競購！Crosby專做AI審合同同法律工作流，已經拎到紅杉資本(Sequoia)、Index Ventures同Bain Capital等風投巨頭注資超過8000萬美元，仲入選埋The Information 50大潛力初創榜單添。

 

　　講到呢度，大家都應該明白Crosby點解要收購威嘉，答案只有兩個字：數據。Crosby呢次想買嘅，主要係威嘉多年來累積嘅「非客戶專屬數據」。喺威嘉嘅百年卷宗裏面，留低咗無數「明星律師」嘅獨門心法：未公開嘅合同修改痕跡、攻防博弈歷史、內部備忘錄，仲有訴訟策略。對AI公司而言，攞到呢批格式規範、邏輯嚴密嘅結構化數據去俾大模型做定制化微調同RAG檢索，簡直就係天降神丹。

 

　　喺AI時代，破產公司嘅數據分分鐘比實體資產仲搶手。以精神航空(Spiri tAirlines)破產清算案為例，航空公司伺服器裏面累積數十年嘅內部Email、員工對話紀錄同營運數據，比著以前真係「狗也不」，如今竟然吸引多家科企激烈爭奪，最終由Google以1000萬美元成功抱得數據歸。

 

　　不過呢啲數據唔係話學就學，因為可以預見合規風險有成座山咁高，點樣徹底將客戶嘅私密資料「去標籤化」？學到嘅知識產權應該歸邊個？數據清洗成本又有幾多？如何保證數據安全？呢啲硬骨頭就留番比Crosby慢慢啃。大家可以參考番2025年基因檢測巨頭23andMe破產案，當時藥企巨頭Regeneron想出價2.56億美元買走擁有對方1500萬用戶嘅基因數據庫，結果全美多個核心大州嘅檢察長同法庭隱私專員強烈介入，要求嚴格保障用戶Opt-out權利同數據去標籤化。

 

　　大家都話科技進步造福人類，但好多人未享受到好處，就已經飯碗不保。當AI可以喺一分鐘內gen完一本完美合約出嚟，亞洲家長眼中又要少咗一份「筍工」，請請！

 

＊編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。