《魚缸博客》恒生國指科指進入「技術性牛市」，點樣解讀呢隻牛？

　　《魚缸博客》今日市場有人話：恒生科技指數、恒生國企指數自4月開始累積20%升幅，定義上可以稱為「技術性牛市」，係咪好振奮呢！不過博客就覺得奇怪囉，如果從4月低位計，國指、科指應該好早就牛咗，連恒指都牛埋添，有神州媒體揀今日push呢條新聞，主要都係見今日升得勁，火上添油贈下慶啫。

　　某程度上點解兩大指數有呢個升幅，其中一個轉捩點就係特朗普係關稅戰主動減稅，呢一戰被認為係美國主動跪低，所以中資概念股都全部升到不似人形。呢一戰亦明顯展現到，美國乃至全世界人都離唔開「Made in China」，原來無左中國商品係咁難過，雞蛋買唔到，加州山火燒完又買唔到重建材料，慘。

　　不過，唔好唔記得，侵侵係一隻老狐狸，歌舞昇平一陣就好，仲有好多問題要面對。

　　第一，就係美國國債同息率問題，美國國債有6.5萬億美元係呢個月到期，問題解決唔到，係環球流動性緊張，港股都無得獨善其身，港元又同美元掛鈎，所以你以為真牛市？

　　第二，企業業績問題，目前炒賣基本上係熱錢流入，同企業基本性無太大關係，香港企業好多仲吊緊鹽水，內地企業大家都搏命內捲緊，仲好似港股大時代咁大家有錢齊齊搵？

　　所以，博客對於呢一輪升幅都係有保留，因為經濟氣氛同公司業績，同個股市升幅唔係一個正比比例，更多嘅係似「虛火」，收割完就走，至於今時今日仲係咪可以用「技術性牛市」去判斷股市，就閣下自理。

　　畢竟而家都係科技業主導股市，今日新科技，出年就唔流行，當電動車、AI變成日常，咁仲係咪「未來概念」？huh，有趣。

《編者按》本欄搜羅即市傳聞，惟消息未經證實，《經濟通》亦不保證內容之準確性。