《魚缸博客》香港金融業人才短缺？係真唔係啊？

　　《魚缸博客》今日博客睇新聞，留意到《彭博》呢一排係咁講，香港金融業人才短缺，從IPO保薦人，到家族財富管理，到到都要人，報導引述招聘公司透露指，具經驗的私人銀行家現時轉職可獲加薪高達25%。

　　要人原因，係因為過去幾年香港金融業不斷CUT人，有好大部分已經過左去星洲搵食，呢頭先安頓好，個頭又話香港要人，一時間邊有咁多人回流呢？不過都反映出確實有資金回流到香港呢個情況，特別係中東危機戰事爆發，中東班油王為左自己嘅身家著想，拿拿聲將自己堆現水散去全球。

　　散去美國咩？呢場中東危機由美國佬開波，一陣特朗普癡起邊條筋又話凍結你資產，到時真係喊出來，所以流入香港確實係一個幾好選擇。

　　至於係咪有中東資金流入香港？到呢一刻大家都唔肯定，雖然本港銀行體系結餘堆錢無多到，但近日港匯近日有走弱情況，特別係HIBOR一個月已經跌穿2厘，今日係1.95%，如果以H+1.3%按揭計劃計算，今日呢個RATE同供CAP一樣，業主們想麥當勞加大嘅期盼又大左。

　　其實港匯走弱係因為美元強勢，定係港元市場需求減弱？真係唔識答你，但香港金融業人才難求呢個應該都係不爭的事實，如果中東危機究竟係「危」定「機」，今日車一舊錢落去，明年今日就會有答案。

《編者按》本欄搜羅即市傳聞，惟消息未經證實，《經濟通》亦不保證內容之準確性。