《魚缸博客》法國一億歐元向中國訂三萬部冷氣，等世界見識咩叫「中國速度」

　　《魚缸博客》話說歐洲熱浪持續，特別係法國、葡萄牙、西班牙呢堆地區，冷氣都一部難求，據聞呢次熱浪係法國死左好多老人家，其中一個主因，係因為法國嘅醫院同護老院根本就無安裝到中央冷氣，呢堆老人家好可能行動不便，就咁監生係室內「焗熟」左。

　　法國官方見到呢個情況，就拿拿聲通過議會撥款一億歐元，向全球落單訂購三萬部冷氣，點解要咁強調「全球」？因為歐洲工業鏈根本都承受唔到呢個突如其來的大訂單；而日韓都曾經被詢問過，不過都表示要排隊兩個月，到時冬天都到了，仲開乜冷氣？

　　呢個時候，中國嘅「美的集團」就行出來表示：我接！

　　唔係誇張，三日半，係中國嘅蕪湖美的廠房，就生產左兩萬部，由組裝到入箱，平均每分鐘就有四部冷氣出廠，嚇到法國當地媒體同法國官方檢測人員，都懷疑個兩萬部冷氣係咪玩具，有咩可能快到？

　　中國嘅工業從來都唔你講笑，你幾耐要貨、幾多錢，做到就盡做。外界分析過，點解「中國速度」可以咁犀利？第一，中國工業從來都係「直線一體化」，唔會有咩總經理、經理、副經理、小經理，總之接完單，收到訂金，唔多使審批就直接開工（印度客除外），你加急就同你開多幾條生產線、調動人手，三日半兩萬部冷氣，全世界都只係得中國做到。

　　第二，中國從來都唔鐘意講咩「全球化」、「轉移生產」，總之美的嘅蕪湖廠房，方圓百里就可以搵到晒生產零件，乜銅管、壓縮器、電線，打個電話就一日內送到，呢種上中下游供應鏈，都只有中國呢種工業大國先齊全，唔使又話同外國訂銅線、國內訂壓縮器，一來一回都一兩個月。

　　歐美國家成日都話要擺脫中國製造，但而家呢個危急關頭就搵中國落單，其實某程度反映出「中國製造」嘅可靠性。反正你有錢，我有貨，大家做到交易，WINWIN啦！

《編者按》本欄搜羅即市傳聞，惟消息未經證實，《經濟通》亦不保證內容之準確性。