魚缸變咗太平洋，已經唔知邊度先係底，反正就係跌極都仲有。不過跌市之下東方甄選(01797)就彈升8個巴仙，原來東方甄選又再撈過界，今次就係搞旅遊。
內媒翻查企查查報道，近期新東方(09901)喺深圳就成立咗「新東方沃凱德文旅有限公司」，法定代表人係傅譯，註冊資本300萬人仔，經營範圍包括有出入境中介服務、會議及展覽服務、資訊諮詢服務、社會經濟諮詢服務、企業管理諮詢等等。公司係由北京新東方沃凱德國際教育旅行有限公司直接100%持股，而後者就由新東方間接100%持股。
其實早喺今年7月新東方已經成立北京新東方文旅，註冊資本成10億人仔。當時由老闆俞敏洪帶隊，出發去咗四川、青海、甘肅等等西部省份，介紹唔同地方嘅名勝景點。當時去到四川嗰陣更加搞咗場直播帶貨，喺供應鏈源頭直接開播，結果收穫4000萬人次收睇直播，GMV仲破億人仔。而每團旅行團都會有東方甄選嘅一位文化講師同一位導遊陪同，實行「寓教於行」。
今日東方甄選公布，「東方甄選文旅」將會喺12月10號正式上線，開台第一擊就係海南、雲南、吉林三地聯播，新平台可以預訂接近100間酒店，提供接近200條旅行路線，明副其實就係攜程(09961)、同程(00780)之類嘅旅遊平台。
新業務掂唔掂，最重要就係同原有業務嘅聯動，點樣帶來更大嘅協同效應會係重點。東方甄選由直播變身電商，「帶貨」係東方甄選同其他電商最唔同嘅要素，而7月嗰次試水溫就係其中一個例子，直播去旅行，觀眾由線上參與變成線下參與，將線上熱度逐步變現。如果由直播主帶隊，比起就咁旅行團嘅吸引力亦都大得多。
未來就要睇文旅業務可以點樣再刺激電商業務，會唔會出現「拼團帶貨」呢？就要睇創意無限嘅俞老闆仲有無新橋喇，請請！
*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。
《說說心理話》【怪獸家長必學】點樣幫仔女溫書不傷感情？培養上進心唔係靠鬧？子女一旦失控教你點應對！► 即睇
40,589.34
