《小傳日記》ＴＶＢ（００５１１）呢期日日都係市場熱話，炒完直播概念出盈警，就被股
民數佢話係有預謀先公布同淘寶合作炒高股價，之後先出盈警，「大台小股東大聯盟」狠批
ＴＶＢ連累無辜追入股民坐艇，更加勸「中伏」嘅股民一齊加入大聯盟。
時隔幾日，大聯盟嘅《改革ＴＶＢ方案》終於出爐，洋洋六千字，痛陳利害，詳細點出大聯
盟認為ＴＶＢ積弱嘅種種原因，再針對問題提供解決辦法，甚至連頂替人選都搵好埋，愛之深恨
之切嘅程度直頭令人諗起《出師表》，係愛呀哈利！《方案》入面就提到，ＴＶＢ身為電視台，
最大根本問題就係劇集製作不善，內容欠缺新意，針對呢點大聯盟建議重視編劇人才，多同外面
合作，發展新嘅ＩＰ。
另外管理方面都係一大重點，大聯盟講明要「全面取締」ＴＶＢ嘅山頭文化，除咗管理藝人
方面下放權力同自由度，最ｊｕｉｃｙ一點就係提到而家嘅助理總經理樂易玲同時為邵氏
（００９５３）嘅執董，會有利益衝突，應該要解除樂小姐喺ＴＶＢ嘅職務！大聯盟仲手起刀落
，建議罷免現時董事局內８名董事中嘅６名董事，包括主席許濤、非執董黎瑞剛、徐敬、獨立非
執董方和、盧永仁同盛智文，之後再換入新血，大聯盟已經搵來６位知名人物頂替以上位置，不
過就話要等ＥＧＭ當日先會揭曉。
商業運作方面都著墨唔少，大聯盟建議ＴＶＢ喺唔同時候配股或者發換股債嚟籌錢，仲可以
適時分拆鄰住買同ＯＴＴ業務套現。
整體來講成份方案鉅細無遺，當然點樣執行可以再雕琢，但係方方面面都有兼顧到，好明顯
落足心機研究。不過又咁講，人事調度方面對於ＴＶＢ嚟講可以算係「雙特辣」，８個董事踢走
６個，連老臣子樂小姐都要出局，一向重視「人際關係」嘅ＴＶＢ相信都唔會咁易啃得落，但係
部分分拆、集資、內容創作方面嘅建議真係諗得過，而家就等睇ＴＶＢ點回應喇，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
etnet Forex版面大革新！一按了解更新詳情，參加遊戲，填問卷贏獎品！► 立即了解與參加
