《小傳日記》分到餅碎都無剩先搞電商！愛奇藝點樣捲贏對手？

　　《小傳日記》科技股內捲年代開始，本業做無可做，無得發展幾多惟有試搞新業務，做電商嘅搞外賣，做外賣嘅搞電商，做教育嘅都搞電商，為咗企得著腳邊有得留力。近期一啲明顯落後於人嘅公司都開始發力，好似京東(09618)、百度(09888)之類，近期仲有百度旗下愛奇藝搞電商。

　　早兩日愛奇藝喺年度大會上宣布做內容電商，以自有嘅IP、藝人同會員優勢嚟發展直播帶貨。創辦人龔宇就提到以前愛奇藝一直係靠會員和廣告收入，未來就開始搞內容電商，但就話唔係貨架電商。

　　但一睇就知係無數前人嘅老路，就算連跟風嘅本地薑代表TVB(00511)一早都已經發掘緊呢方面，愛奇藝身為美股中概兼內地影片平台龍頭之一，到而家呢個年代先入局，已經算係真正嘅「太遲先生」。就算唔計未入流嘅TVB電商，上面東方甄選(01797)、抖音、快手(01024)，有嘅係一早紮根行業嘅對手，愛奇藝而家嚟做實在係難。

　　但有意見就分析出愛奇藝嘅突圍要素，就係旗下巨量嘅劇集IP，以情感連繫、「情緒價值」以至係明星資源同會員生態等吸引情感消費，以高黏度發掘重質不重量嘅消費。有內媒就引述業界分析，未來愛奇藝直播平台好大可能會將劇集IP變成帶貨場景，例如劇集同款風褸，或者植入式廣告之類，又或者直接喺綜藝入面聯名等等，帶動情緒消費……咁，同TVB直播帶貨都差唔多啫。

　　唔知呢種「直入式廣告」可以做得幾盡，但如果扑得中確實係可以帶動到流量變現，路向嚟講係唔錯，但始終唔係自己貨架，最後咪又係變成幫人賣廣告。軟性可以帶動幾多流量，又可以變現幾多流量，好難講，但筆者以用家嚟講，畀咗錢做尊貴會員，結果係畀我睇加長版「宣傳易」，咁真係會嬲到一秒熄機，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。