《小傳日記》「撤辣」改口叫「減辣」，亦步亦趨就係辦法？

　　《小傳日記》雖然近期阿爺頻頻救市，三不五時就聽到阿爺又扭咗啲咩花臣出來救市，先有證券交易印花稅減半，再到之前認房不認貸同劃一首付比例等等嘅「樓市組合拳」，到今日人行正式降準，不過魚缸就係谷極都唔起，今日有降準加持總成交先接近1200億銀。
　　樓市方面都係不遑多讓，講緊無論係上面樓市定係本地樓市。上面雖然組合拳就耍咗，不過有幾入肉就起碼要睇多個月，等房企銷售數據公布先睇得到。而本地樓市方面，死氣沉沉，差唔多隔日都會聽到某位商界名人出來嗌撤辣。
　　而近期甚至地產界開始態度軟化，由「撤辣」改為叫「減辣」。而趁住近期施政報告諮詢期，呢兩日分別有兩位前任財政司司長，分別係梁錦松同唐英年，都先後接受傳媒訪問時提出有關「減辣」建議。唐英年提議，可以考慮3000萬銀以上豪宅免收從價印花稅，因為普羅大眾好少買3000萬銀以上嘅豪宅，而去鼓勵有財政能力嘅人買多間屋畀仔女。而梁錦松就話如果樓市再跌落去，就應該要開始「減辣」，因為再跌就會影響銀行體系。
　　其實近年港府嘅施政都係「摸著石頭過河」，不過係摸著阿爺行完嗰塊石嚟過河。好多時阿爺唔做，呢邊都未必會做。正如之前神州證券交易印花稅減半來提高股票市場流動性，之後一日呢邊先開始成立小組來考慮點樣「提高股票市場流動性」。有唔少孖屐人士都大呻呢邊反應慢幾拍，因為之前7月底政治局會議都提過要「活躍資本市場」，講咗成個月等到上面落實咗，呢邊先開始「研究」。
　　所以實際上，唐英年建議都比較務實，因為鼓勵父母為仔女買樓，背後出發點同「認房不認貸」一樣，鼓勵需求得來又唔會太刺激炒作，而且係阿爺已經出台嘅政策，呢邊行起上來都夠曬「底氣」喇卦？請請！
　
*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。