《魚缸博客》鮑爺話難以回到接近零利率時代，你又點睇呢？

　　《魚缸博客》本來早幾個月話6月必定減息，到而家6月不減息機率去到八成，睇怕今年預測所謂「減息三次」都可能機會渺茫啦。

　　美聯儲主席鮑爺（鮑威爾）最近表示，隨著美國經濟變化和政策變動，長期利率可能較高，即使長期通脹預期符合美聯儲的2%目標，接近零利率的時代也不太可能短期內回歸。

　　點解搞到咁？最大原因就係侵侵搞到美國經濟五癆七傷，同一時間全世界對關稅戰唔賣帳。有部分KOL認為侵侵其實已經勝利，因為「開天殺價落地還錢」用係關稅戰上，侵侵已經拎到自己想要關稅額，博客對於呢種「精神勝利法」表示欣賞，但有啲嘢贏就係贏，輸就係輸。某程度上美國仲想做昔日「大佬」，但發現自己已經得罪全世界，關稅戰亦彰顯美國已經無辦法離開「made in China」呢件事。

　　點解鮑爺話零利率時代應該無咩可能，有一個核心命題鮑爺無講，但其實不言而喻：美元已經無以前咁值錢。以前美元就話世界通行，石油黃金計價貨幣，但個世界已經唔同晒，全世界都同神州做生意，人民幣地位亦逐步提升，加上神州而家對於石油需求無以前咁犀利，同時國產貨賣到全球，拎人民幣做生意而家都係主流。

　　當然，鮑爺一路都話，唔減息原因係因為美國通脹問題，但真心講句，就算通脹降到2%樓下，又唔見得你會減息；因為大家近期都發現美元美債連「避險」呢個功能都開始失效，近期熱錢流入亞洲市場就係最好例子。

　　Anyway，而家香港其實有藉口脫離聯繫貨幣制度，當然唔會掛人民幣啦！而係做「一籃子貨幣」，呢個不論對香港經濟、香港業主、香港市民都係最好嘅貨幣政策，至於個藍有幾多人民幣、有幾多日圓、有幾多美元，呢個咪慢慢傾囉。

《編者按》本欄搜羅即市傳聞，惟消息未經證實，《經濟通》亦不保證內容之準確性。