《小傳日記》小米晶片號稱殺入3nm，技術大躍進股價冇反應？

　　《小傳日記》今日小米(01810)官宣「玄戒O1」晶片將採用第二代3nm工藝製程，3納米喎，咪即係追平境外同行蘋果、高通、聯發科囉，神州媒體更稱之為「中國3nm晶片設計嘅一次突破，緊追國際先進水平」！

　　睇返玄戒O1嘅介紹，乜「190億個晶體管」、「旗艦性能」、「第二代3nm工藝」、「小米自主研發設計」，比國之重器華為更強，但奈何咁振奮人心嘅消息，小米股價反應就麻麻，倒升咗3%咁大把，莫非資本市場唔夠愛國？

　　原因好明顯啫，自主研發晶片唔係話打機儲經驗值升level咁簡單，如果埋頭苦幹三五年就可以超英趕美，咁神州早就突破技術限制啦，所以大家都估計，小米所謂嘅「自主研發」，可能係又一款「貼牌中國芯」。有行內人話，業界公認嘅晶片自主研發係指「自研IP+集成基帶」，但從目前嘅信息嚟睇，小米晶片嘅CPU架構係ARM公版，冇自研CPU內核，而GPU係來自英國Imagination授權，通信基帶係外掛聯發科，甚至連5G功能都冇被集成到。換句話講，小米晶片只不過係將外國公司嘅組件砌埋一齊，同真正自主研發仲有距離，令筆者不禁想起另一款國產驕傲，呢度唔講啦。

　　至於3納米製程當然係頂尖啦，不過問題係小米都只係搵代工做啫，最可能嘅供應商都係台積電，咁就無咩突破啦！當然都有人會話代工廠可能係國產龍頭中芯科技(00981)，嗯，之前華為手機的確係傳出用中芯代工嘅晶片，不過都只係傳聞啫，就算中芯做得出，良率低下導致嘅成本問題都不容忽視。

　　但點解小米依然要投入超過135億人仔，逾2500人去研發哩粒晶片呢？有人就話，玄戒O1嘅重要性唔係宜家可以幫助小米賣多幾台手機，而係佢可以幫助小米手機保障供應鏈穩定嘅一張底牌，玄戒O1嘅出現至少可以將企業對晶片供應鏈嘅「全依賴」變成「部分控制」。不過呢，如果小米因為吹噓過度而被花旗國納入制裁清單，除非提前儲夠貨，否則一樣被「掐脖子」，無芯可用。

　　今次玄戒O1首發於小米15S Pro特別版，定價喺3000至3500人仔區間，既避開咗高端價位，避免同高通晶片硬碰硬，又牽手周年紀念版手機，有品牌情懷保駕護航，小幅試水睇下消費者對自研晶片嘅接受度，你又有冇興趣？請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。