《魚缸博客》疫情封城一樣掂，百勝中國有排升！

　　《魚缸博客》今朝內地公布8月份「三頭馬車」數據，固定投資按年增長3.2%，增幅略低於預期嘅3.3%同7月份嘅3.4%；工業生產按年增長4.5%，好過預期嘅4%同7月份嘅3.7%；8月零售銷按年增長4.6%，同樣好過預期嘅3%同7月份嘅2.5%。
　　另外，人行宣布，由今日(15日)起下調金融機構存款準備金率0.25個百分點，但唔包括已執行5%存款準備金率的金融機構，預期今次降準將會釋放中長期流動性逾5000億人仔。
　　尋晚美股三大指數升幅都接近1%，今朝恒指裂口上升106點，報18154。三頭馬車數據公布後，恒指升幅擴大到超過250點。近日恒指雖然多次跌穿18000心理位，但係淡友都未能進一步壓低指數，又或者唔敢大手沽落去，反映市場對於恒指係咪仲有好大下跌空間都有啲懷疑，加上最壞時間應已過去，依家處於修復階段，低位反覆等突破機會較大。
　　個股方面，都係以穩陣為主。民以食為先，今次睇下隻百勝中國(09987)，集團截至6月30日止中期淨利潤為4.86億美金，比舊年同期增長1.66倍，每股盈利1.16銀美金。總收入就接近56億美金，增長16%，集團又話今個財年目標不變，包括淨新增約1100至1300家新店，以及資本開支7億至9億美金。
　　舊年內地疫情嚴峻同採取封城措施，百勝中國嘅盈利能力超強，摩通更喺8月30日增持115萬股，涉資4.79億港銀。
　　技術上，百勝中國尋日以大陽燭向上突破，今朝高見449銀，破埋條250天線，以大型波動區間400至500銀計，由今朝高位計，上番500銀就有超過11%上升空間，但500銀肯定唔係頂部，長線應可進一步上升，粗略估計，預期升到接近640銀先有阻力。(pc)
　
《編者按》本欄搜羅即市傳聞，惟消息未經證實，《經濟通》亦不保證內容之準確性。