《魚缸博客》中國稀土產業已經變成另一個巨人，歌利亞都打唔低！

　　《魚缸博客》呢個幾禮拜，個個都係到講緊中國稀土產業點點點，美國佬點解又會「跪」，乜稀土呢樣嘢技術含量咁高，高到連所謂擁有高科技產業嘅美國都要跪求中國？咁博客就要同你睇下稀土嘅「前世今生」啦。

　　所謂「稀土」，其實係一種土壤入面擁有大約17種礦物，呢堆礦物抽取出嚟之後，小至汽車電飯煲晶片，大至飛機核彈，都需要用到呢種「礦物」，簡單來講無稀土，你幾高科技都無用，除非你有多啦A夢。

　　其實80年代之前，美國都仲係稀土大國，本身都有儲存量，技術上都係美國主導，特別係加州有礦，滿足當時全球九成需求。當年美蘇交戰，美國為防止稀土「用到盡」，所以轉向去同中國採購，打算買曬中國稀土之後，再用高價賣返俾中國。

　　如意算盤就係咁打，但中國點會咁笨唔知你用意，反而做個順水人情，你要買俾你買，而且用「低價」賣到全球，頂死晒全球稀土行業，包括抽取稀土入面礦物嘅技術，原本美資公司搬去中國，打算食晒中國稀土，點知都頂唔住價格戰，最後都係俾中資機構收購，而家主要供給美國軍方使用稀土嘅公司麥格昆磁(NEO），背後兩大股東分別係中科三環同中國有色集團。

　　即係話，你有稀土都無用，你無技術從中抽取礦物，稀土同陶瓷土無分別；而中國擁有專利項目比美國多23000幾項。到美國發現自己原來稀土行業落後中國15年嗰陣，已經係2010年，當年中國入口稀土數目係大過出口數目兩三倍，點解？因為稀土先要入口中國抽取礦物再賣返出去先值錢，所以中國其實唔止係「稀土大國」，更係「稀土技術大國」，全世界稀土都要去中國做處理先賣到出街。

　　中國某程度上已經變成另外一個「巨人」，一個連歌利亞都無法打低嘅巨人，呢一點係大家都估唔到，當發現到之後，可能已經太遲了。
　
《編者按》本欄搜羅即市傳聞，惟消息未經證實，《經濟通》亦不保證內容之準確性。