《小傳日記》畀高價清潔費仲要做家務？Airbnb白紙黑字禁房東轉嫁執屋責任

　　《小傳日記》試想下你外遊度過一個完美假期，但係退房當日你唔單止要執行李退房，仲要對住房東傳嚟嘅「退房清單」逐樣交差：碗要洗好擺返落櫃、床單被袋要全部拆落嚟、垃圾要分類拎去幾條街外嘅垃圾站、鎖匙要放返落密碼箱……你一邊化身清潔姐姐還原房間，另一邊仲要睇住退房時間夠鐘即走，不過就算你係五星級租客都好，喺美國，房東都係要收你100到200美金嘅「清潔費」！

　　民怨累積咗咁多年，Airbnb決定要為廣大房客出口氣！Airbnb宣布更新「房客守則政策」，由2026年11月20日起預訂嘅訂單，房東唔可以再強制要求房客喺退房前拆床單、洗碗收碗、開洗衣機，或者將垃圾帶離屋企範圍。官方喺Help Center寫得好清楚：「凡係需要花費大量精力時間、原本應該由專業清潔人員負責嘅工作，房東通通唔准推畀客人，更唔可以私自向房客罰款！」

　　官方仲出咗一組非常具體嘅「Dos & Don'ts」規範，涵蓋洗碗，掉垃圾，拆床單等等，方便房東同房客釐清「清潔費」同「房客責任」嘅關係。順帶一提，Airbnb同時仲收緊咗房東可以設嘅「標準規則」，除咗官方允許嘅七項要求外，其餘要求一律要放喺「請求」欄，而且必須喺預訂之前寫喺房源頁面，唔准入住之後先至透過訊息、門口貼紙或者當面「臨時加碼」。違規嘅房東會面臨警告、降低曝光度甚至下架！消息一出，唔少用家都大讚Airbnb今次係德政！

　　至於房東呢邊當然就怨氣衝天啦，好多房東認為，Airbnb本來係「共享經濟」嘅典範，而家為咗留住用家剝削房東權益，房東私人房產淪為由Airbnb管理嘅連鎖酒店，而且因為新規之下房東要花更多時間清潔房間，擔心會影響下一位房客嘅入住。部分個人房東甚至表示，如果平台完全倒向消費者至上、唔再尊重房東嘅維護規則，佢哋寧願下架房源退場。

　　今次Airbnb新規令筆者想起神州嘅外賣同call車平台，本身都係共享經濟發展下改變行業生態嘅互聯網產品，由用家同平台互相成就，但當行業整合到一定程度之後，就變成騎手同司機幫平台打工，平台嘅要求就愈來愈嚴苛，唔少外賣騎手為免送餐遲到被罰錢，不惜危險駕駛險象環生。平台釐清房東同租客之間嘅責任歸屬，恐怕只會引發更多紛爭：房客會唔會怕蝕底而唔去主動清潔房間？房客又係唔係有權利完全唔收拾，搞到房間好似十級災難現場？對於Airbnb來講，住客係客，房東都一樣係客，保護租客權益係理所當然，但房東咁多年來為平台貢獻優質房源，都應該要兼顧佢哋嘅權益，說一千道一萬，如果平台致力於維持良好嘅社群氣氛，可能就唔需要走到白紙黑字呢一步，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。