楠楠自語－莫灝楠 | 債息已見頂？

　　《楠楠自語》債息已經到了頂峰？

　　1. 美國10年期國債孳息率由5.5%高位回落至5%左右，但最新數據未支持「已經見頂、即將減息」呢句定論。美國聯儲局10月底按兵不動，官方路徑仲預期可能再加息一次；10年期債息由10月初高位回落過，但CPI公布後又反彈，相對高位有回落，但唔好當減息周期已經開始。

　　2. 通脹要分開「歷史」同「預期」嚟睇。聯儲局更看重嘅核心PCE，仍然明顯高過2%目標，近月未見明顯回落；核心CPI有緩慢回落跡象，但能源價格高企令數字跌得慢。部分通脹預期有回落，最主要係油價從高位回吐，10月布蘭特油價仍然好高，11月初已經跌穿100美元。遠期預期隨油價回咗一截，通脹開始放緩，但仍然有一定韌性。

　　3. 地緣亦未見到打完嘅時間表。霍爾木茲海峽由2月到依家，供應中斷已較年中高峰收窄，但官方仍提醒流量隨時會再被打斷；俄烏會談被形容為有建設性，但未達成停火。戰事一日未真正緩和，油價同通脹就唔可以當佢已經完場。

　　4. 講到高息股，值得留意易方達亞太高股息ETF(03483)。佢組合核心係內地收息股，好多都係國企銀行同能源股，派息相對有持續性，增長通常唔高，但作為收息底倉講得過去；再配澳洲同日本嘅穩定股票，降低單一地域風險：澳洲偏資源同銀行，日本則有電訊、公用呢類現金流穩定嘅公司；能源股有一定佔比，資源價格波動仍然會有影響，但average out都屬於可控範圍。

　　5. 點解債息下跌會最直接幫到高息股估值？股價可以看成未來股息折現後嘅價值，債息下跌，折現率下降，同一筆股息今日就更值錢。高息、低增長嘅股票更似債券，對息率更加敏感，債息一跌，股票股息亦相對更吸引。《元宇證券基金經理（權益類）　莫灝楠》

＊《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。