《魚缸博客》私募信貸早前曾爆雷，歸咎原因竟然關AI事？

　　《魚缸博客》如果大家有留意開外國財經新聞，應該有留意有關外國「私募信貸爆雷」事件，其中主要講緊美國私募信貸基金出現贖回潮，包括個別投資人今年第一季向黑石、貝萊德、Cliffwater、摩根士丹利及Monroe資本等基金管理機構共提出101億美元的贖回要求，惟相關機構僅同意執行70%的贖回要求，即限制投資者贖回資金。

　　點解會發生呢種事，又點解限制投資者贖回資金呢？咁你首先就要知道咩係私募信貸。

　　所以「私募信貸基金」，其實係一種基金，其資金來源可以係養老金、保險業、或者一啲大型投資者；偷資落呢個「基金」之後，基金主要業務其實係做「放貸」相關業務，但佢嘅客戶多數係大型（講緊億元以上），而且銀行唔太肯借錢俾佢地，就會搵呢啲私募信貸借錢，通常借錢嘅利率會係係基準利率上，加多三厘至六厘。

　　所謂「虧本生意無人做，殺頭生意有人做」，呢種信貸係過去一路都順風順水、利錢又高；但自AI出現之後，個市場就完全唔同玩法。因為AI改變晒成個科技圈生態，一啲舊有科技公司，或者SaaS公司，因為AI浪潮下就少左收入，從而無辦法立即還得上錢，而呢班舊有科技公司，就佔左私募基金其中一個比較大的債仔份額。當然啦，咁私募信貸基金又唔會迫死你，你而家還唔到，咪將利息一路疊上去本金先，愈滾愈大。

　　但投資者見到班債仔無錢還，擔心自己筆投資凍過水，所以就想提早贖回，但生意呢家嘢大家講合約，你提早贖回，但我筆錢就借走出去，我哪裏有錢俾你贖回呢？於是班基金佬就提出限制投資者贖回資金；你愈限制我，我就愈驚，所以就慢慢出現類似人踩人情況。

　　不過，其實呢個規模對比以前雷曼事件，都係蚊同牛比，大家都唔使太擔心，可能就難為左班有錢佬，畢竟今時今日個世界，借一千蚊債主惡過債仔，但借一千萬，就債仔惡過債主，呵呵。

《編者按》本欄搜羅即市傳聞，惟消息未經證實，《經濟通》亦不保證內容之準確性。