小傳日記 | Pokemon卡大戰完勝鍾培生，龍豐出招快狠準股民期待一齊贏！
瘦田無人耕，耕開有人爭。食住Pokemon卡熱潮鍾培生今年中成立HKTCG，號稱要打造全港最大嘅遊戲卡交易中心，甚至係全球卡牌文化嘅朝聖地，開張幾個月以來線上線下同步賣卡。卡友都信得過鍾生唔會搭雞棚，寧願食炒價都要幫襯佢買9月Pokemon官方新出嘅30周年卡包(M6a)，都係為求買得安心。但自從龍豐(02290)加入戰團賣卡，鍾生無論喺價錢上，定係送貨速度上都不如龍豐，鍾生呢次真係輸人又輸陣。
HKTCG 5月宣布成立，實體舖7月開張，9月開賣嘅M6a好明顯就係鍾生嘅頭炮。為咗證明檔次勝過信和同網店，HKTCG最初係將原盒日文版M6a標價1800蚊！據日本寶可夢官方，一盒20包，每包6張卡嘅M6a原價係7200円，折合港紙400蚊有找，就算係繁中版，官方建議零售價都係500蚊，鍾生標價食水三倍有多，但都有卡友肯埋單，除咗相信仲有得炒，當然係信得過「鍾培生」嘅招牌。
不過開賣無耐，做開藥妝生意嘅龍豐突然殺入戰場，一嚟就以平過HKTCG一截嘅$1550開賣，更加講明9月內有貨，比起HKTCG標明10月到貨更平兼更快。有唔少買家聲稱已經向HKTCG要求退貨，但都被HKTCG打回頭。對手低價搶客，HKTCG都唯有減價應對，預訂價減到$1480，針對唔同套餐仲有得再平。龍豐為搶攻TCG卡市場似乎早有準備，先有2000盒標明9月到港嘅$1299特惠快貨，面對HKTCG減價迎擊，更加喺9月底推出「無敵價」（龍豐宣稱）$828，1500盒大貨今個星期經已陸續送出，HKTCG根本冇還擊之力。時至今日已經踏入10月嘅第二個星期，上個星期阿鍾生先喺Facebook出片，話呢批大貨會陸續今個月出貨，「100%月底前會出曬貨」，但與此同時龍豐已經出完一批再一批。
如果嚟個賽後檢討，帳面上鍾生應該賺得龍豐多，但計牌面就係龍豐大獲全勝。由一開始HKTCG在明龍豐在暗就已經為龍豐提供優勢，自HKTCG開放預訂之後一日龍豐就忽然低價開訂，明顯係有備而來，要殺HKTCG一個措手不及。面對HKTCG嘅減價反擊，龍豐都一早制定好減價進程，HKTCG減幾多，佢就再減低啲，仲要標明更快到貨，而HKTCG一次過嘅大貨，只能夠喺10月內陸續到齊，比起龍豐打游擊逐批到貨，鍾生明顯輸蝕。早排有記者直面鍾培生問點睇呢次減價戰，佢就不點面提到有原本唔係做TCG生意嘅商戶直表將遊戲卡當宣傳開支：的確如果以龍豐最平價$828計，扣除大約一半係成本，剩低運費方面七除八扣根本賺得唔多。
再睇返過去呢個幾月龍豐小編的確重炮出擊，Facebook、Instagram同Thread都幾乎每一兩日就會更新有關Pokemon卡產品資訊，除咗當紅M6a就連其他系列都有新貨返，針對M6a因為根本每隔幾日就有一批新貨返，可以話呢個幾月以來都緊貼返貨進度，以短片形式出Reels同步用流量刷更新，近乎每日一炮咁出擊HKTCG，每一次出post返貨，幾乎都係再一次重擊仲未返到大貨嘅HKTCG。
去到今日仲介有唔少幫襯咗HKTCG嘅網友每日喺連登問收到貨未，但龍豐早已連最後一批$828都全部寄出，有網友喺鍾生條Facebook片下面都講到，要買要炒一早9月收貨已經食咗頭啖湯，到今日M6a炒價已經大跌，10月先收貨再放出去都炒唔到幾多。再反觀龍豐喺每個返貨post度都強調「快」、「誠信」、「信心保證」之類keywords，根本就已經用賣卡嚟做咗一次公關campaign，睇怕啲客仔都唔會再用番HKTCG。話說回來，龍豐股價最近高見4.7蚊，就快要修復5.18蚊發行價，如果成功修復發行價，龍豐就真係「win win一齊贏」喇，請請！