巴巴(09988)公布世紀大重組,親身示範點樣配合反壟斷政策。雖然唔再全面擁有來自六大業務嘅盈利,不過如果分拆之後獨立上市,將會釋放個別業務價值,到時就有錢齊齊賺,亦都配合到阿爺政策。
今日消息利好之下,阿里系全線水漲船高,博客今日就同大家睇吓隻阿里健康(00241)。阿里健康截至舊年9月底中期純利轉虧為盈賺1.6億人仔,總收入約115億人仔,按年多22.9%。阿里健康中期成功轉賺,好大程度多得上年疫情,神州市民無得出街但又要買防疫物資,所以唯有網購,變相刺激網上藥房銷量。
而阿爺對於互聯網醫療嘅睇法都鬆咗唔少,舊年周圍封城,當特效藥等等防疫物資都短缺甚至炒到貴曬時,阿爺最後都係依賴網上藥房嚟「配給」一套包括連花清瘟同布洛芬嘅防疫套裝,確診後可以經網上藥房買一份「中招套裝」,亦得以解決當時中招無藥食嘅嚴重情況。
另外,中國國務院辦公廳印發《關於進一步完善醫療衛生服務體系的意見》,要求總結新冠疫情防控經驗,促進優質醫療資源擴容同區域均衡布局。其中提到須要完善「互聯網+」醫療服務、上門提供醫療服務等收費政策;發展「互聯網+醫療健康」,加快推進互聯網、區塊鏈、物聯網、人工智能、雲計算、大數據等在醫療衛生領域中的應用。可以睇到神州新班子上場後好大可能會推動互聯網醫療發展,更加有人憧憬互聯網醫療可望納入醫保範圍,令網醫股業務更加有保障。
之前阿里健康落到5.3銀水平,未到250天線已經有一定支持,然後重新向上,目前正係挑戰緊100天線。未來阿爺將會全力促進經濟,如果互聯網醫療真係計入醫保,阿里健康突破百天線試8銀都唔難,近日落到6至6.1銀水平都有明顯資金流入追捧,所以6銀會係最perfect嘅入手位置,唔跌穿5.3銀都可以揸住先!
《編者按》本欄搜羅即市傳聞,惟消息未經證實,《經濟通》亦不保證內容之準確性。
【與拍賣官看藝術】常玉作品屢創天價,背後其實藏著跌宕起伏的人生► 即睇