《魚缸博客》SpaceX同Tesla合併：馬斯克嘅萬億豪賭

　　《魚缸博客》一隻Tesla(US.TSLA)，一隻SpaceX(US.SPCX)，兩隻嘢傳合併傳到沸沸揚揚，馬斯克喺SpaceX財報電話會上親口講，兩間公司合併係「一個好主意」，雙方已成立特別委員會磋商。華爾街即刻興奮，SpaceX盤後彈8%，Tesla跟住炒上。但興奮還興奮，呢單嘢嘅好處同壞處，要逐樣拆開睇。

　　先講好處，就係現金流互補，呢個係最實在嘅協同效應，其中嚟自兩間公司正在德州合建嘅Terafab芯片廠，呢個項目最終成本可能高達1190億美元，專門生產自動駕駛、機械人同軌道數據中心用嘅芯片，即係馬斯克想繞過英偉達(US.NVDA)同台積電(US.TSM)嘅大計。問題係，SpaceX今年上半年蝕咗11億美元，AI業務雖然收入急升，但資本開支同樣驚人。反觀Tesla，汽車業務毛利率高、現金流穩定，啱啱好可以填補SpaceX嘅資金缺口。Fortuna Investments嘅CEO表示，Tesla嘅現金流可以為SpaceX嘅星艦同算力基建提供彈藥。

　　其次，馬斯克控制權集中，決策更快。呢個好處，對馬斯克本人嚟講最實際。佢喺SpaceX揸住約85%投票權，但喺Tesla得大約20%。有分析估計，合併之後，馬斯克喺新實體嘅投票權會升至約57%至58%。即係話，佢終於可以喺Tesla度「話晒事」，唔使成日俾股東大會牽制。對於支持者嚟講，呢個代表決策效率提升，唔使再喺兩間公司之間左顧右盼。

　　不過換股交易，Tesla股東溢價會被蠶食，呢個係最需要睇清楚嘅一點。巴克萊估計，如果SpaceX收購Tesla，作價大約每股480美元，較Tesla現價有大約30%溢價。聽落好吸引？但Future Fund嘅Gary Black警告，由於交易好可能以全股票形式完成，合併後嘅公司會以估值倍數較低嘅一方（即SpaceX）嚟定價，Tesla股東收到嘅溢價，會喺交易完成前被套利交易逐步侵蝕。Black仲估，合併可能令Tesla估值下降20%至25%，原因包括股東持股被稀釋，以及合併後公司可能面臨「企業集團折價」。簡單講：帳面好似有溢價，但埋單計數可能仲蝕。
　　
　　另外，合併之後，投資者買一隻股票，就等於同時押注電動車、機械人、火箭、衛星互聯網、AI、社交媒體，即係相當於將大量雞蛋放入一個野心十足嘅籃子。如果你睇好馬斯克成個願景，呢個係好事。但如果你只想買車廠，唔想孭火箭同衛星嘅風險，合併之後你就冇得揀。

　　Tesla喺消息傳出後一度炒上368美元樓上。SpaceX盤後彈8%。短線嚟講，憧憬消息仍然有得炒，巴克萊估計合併可能喺12月3日Tesla股東大會前宣布。但要留意，Tesla今年至今仍然跌約18%，基本面壓力未消。SpaceX嘅估值亦唔平，市銷率高達68倍。有分析師建議投資者「靠邊站」，等基本面同財務信息更清晰先再諗。
　　
　　如果你係長線持有Tesla，就要諗清楚：你係咪接受自己嘅投資由「車廠」變成「馬斯克綜合企業」？你係咪接受投票權進一步集中喺一個人手上？如果你係想買SpaceX，合併與否其實唔影響你對佢AI同太空業務嘅判斷。反而要問：68倍市銷率，係咪已經反映咗所有好消息？
　　
《編者按》本欄搜羅即市傳聞，惟消息未經證實，《經濟通》亦不保證內容之準確性。