《笑傲缸湖》想野生捕捉女賭神？去金沙巴黎人啦！

　　馬交（Ｍａｃａｕ）一班賭仔經歷過差不多兩年嘅大跌之後，辛辛苦苦從谷底爬返上嚟。而公布咗上年度第四季業績嘅金沙（０１９２８），今日（２６日）就成日缸友嘅話題，事因公司竟然敗喺一位女賭神手上！
　　正當大家都好關注金沙新場「巴黎人」開業第一個季度嘅表現，公司就話季內巴黎人新場嘅非轉碼贏率得１８巴仙，比威尼斯人嘅２５巴仙同金沙城嘅１９巴仙要低。公司高層話，原因係有「一名女士」幾乎日日贏錢所致！至於後續點樣處置呢位女士？而呢位女士係邊個？咁就無從稽考啦。
　　公司又話，係行衰運先令馬交業務收入減少６０００萬美金，希望集團下個月去東灜考察時，可以順便轉一轉個運，等公司賺大錢啦。
　　各位缸友如果有興趣，都不妨喺新春期間去馬交搵吓呢位女賭神，然後報料畀盈盈知呀！《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。